کرکٹ کمیٹی بنانے کے لیے مصباح الحق کے رابطے، کئی سابق کرکٹرز نے معذرت کر لی

چئیرمین پی سی بی ذکا اشرف کے مشیر و قومی کرکٹ ٹیم کے سابق کپتان مصباح الحق کا کرکٹ کمیٹی بنانے کا مشن، مصباح الحق نے سابق کرکٹرز سے رابطے شروع کر دئیے۔

ذرائع کے مطابق کمیٹی کے سربراہ مصباح الحق کی ڈومیسٹک اسٹرکچر کی تیاری کے حوالے سے پہلی میٹنگ گزشتہ روز ہوئی ہے اورکرکٹ کمیٹی کے سربراہ مصباح الحق ذکا اشرف سے آج ملاقات کریں گے۔

اردو کرانیکل کے ذرائع کے مطابق سابق چیف سلیکٹر محمد وسیم ،انضمام الحق،اظہر علی اور مشتاق احمد، چیف سلیکٹر  کی دوڑ میں شامل ہیں، مصباح الحق یہی نام ذکا اشرف کو تجویز کریں گے۔

مصباح الحق کا انضمام الحق، وقار یونس، محمد حفیظ، راشد لطیف اور اظہر علی سے رابطہ ہوا ہے اور تمام سابق کرکٹرز نے کمیٹی کے ممبر بننے  کے لیے وقت مانگ لیا ہے۔

تاہم  کچھ سابق کرکٹرز نے مصروفیات کے باعث کمیٹی کا ممبر بننے سے معذرت کرلی ہے،چیف سلیکٹر کی تقرری کے بعد ایشیاکپ اور ورلڈ کپ کے اسکواڈ کا اعلان کیا جائے گا۔