لاپتہ شہری کی بازیابی کا کیس: اسلام آباد ہائیکورٹ نے ISI اور MI کے سیکٹر کمانڈرز کے دستخط کے ساتھ رپورٹ طلب کر لی

اسلام آباد ہائیکورٹ نے آزادکشمیرکے شہری کی بازیابی کیس میں آئی ایس آئی اورایم آئی سیکٹر کمانڈرزکودستخط کےساتھ رپورٹ جمع کرانے کا حکم دے دیا ، جسٹس محسن اخترکیانی نے ریمارکس دیے سیکرٹری دفاع کو تو پتہ ہی نہیں ہوتا کہ کیا ہورہا ہے؟ دونوں افسران کے دستخط کے ساتھ رپورٹ اس لیے لے رہے  ہیں کہ اسکے نتائج ہونگے۔

جسٹس محسن اختر کیانی نے آزاد کشمیرکے شہری کی بازیابی سے متعلق درخواست پرسماعت کی ، پولیس اورایف آئی اے کی رپورٹ عدالت میں پیش کی گئی، سرکاری وکیل نےبتایاکہ پولیس کے پاس خواجہ خورشید کیخلاف کوئی مقدمہ درج نہیں ہے۔

جسٹس محسن کیانی نے وزارت دفاع کی رپورٹ سے متعلق پوچھا تونمائندہ وزارت دفاع نے مہلت کی استدعا کرتے ہوئے موقف اپنایاکہ کل نوٹس موصول ہوا تھوڑا وقت دے دیں، جسٹس محسن اخترکیانی نے ریمارکس دیے کہ آئی ایس آئی اورایم آئی سیکٹر کمانڈرزکے دستخط کے ساتھ رپورٹ جمع کرائیں دستخط کےساتھ رپورٹ اس لیےلےرہے ہیں کہ اسکے نتائج ہونگے۔

نمائندہ وزارت دفاع نے پیرتک مہلت کی استدعا کی تو جسٹس محسن اخترکیانی نے کہا پیرکوخالد خورشید کو 21 دن ہوجائیں گے، کسی دہشتگردی یاریاست مخالف سرگرمی میں شامل ہے تواسکے خلاف کارروائی کریں اگراسکا کوئی مجرمانہ فعل ہے توکارروائی کریں کسی کواعتراض نہیں ہوگا عدالت نے سماعت 24 جون تک ملتوی کردی