نیا دور، صاف ستھرا لاہور، وزیراعلیٰ نے لاہور کی تمام چھوٹی بڑی سڑکوں کی مرمت، گلیوں میں ٹف ٹائل لگانے کی ہدایت کردی

"نیا دور۔۔۔ صاف ستھرا لاہور”،لاہور کی تعمیر وترقی کاپلان، وزیر اعلیٰ مریم نواز شریف نے ہنگامی بنیادوں پر تکمیل کے لئے تین ماہ کی ڈیڈ لائن دے دی۔لاہور کی تمام  چھوٹی بڑی روڈزکی تعمیر ومرمت کی جائے گی،وزیراعلیٰ پنجاب نے گلیاں پکی بنانے  اور ٹف ٹائل لگانے کے پراجیکٹ کی  منظوری دے دی۔

وزیراعلیٰ مریم نواز کی صدارت میں لاہور کی تعمیر و ترقی کے متعلق اجلاس ہوا۔اجلاس میں فیصلہ ہوا کہ لاہور کی تمام  چھوٹی بڑی روڈزکی تعمیر ومرمت کی جائے گی۔

وزیر اعلیٰ نے  گلیاں پکی بنانے اور ٹف ٹائل لگانے کے پراجیکٹ کی منظوری دے دی،وزیر اعلیٰ مریم نوازہر دس دن کے بعدلاہور کی تعمیروترقی کے پلان پر عملدرآمد کا جائزہ لیں گی۔

اجلاس کے دوران لاہور میں دو لاکھ 22 ہزار سٹریٹ لائٹس کی بحالی کا اصولی فیصلہ کیا گیا،لاہور کے 9زون میں ڈرینج اور سیوریج کی بحالی اورتعمیر ومرمت کا جائزہ لیا گیا۔

وزیراعلیٰ نے سیورماسٹر پلان اور واٹر ٹینک بنانے کے پراجیکٹ پرجامع پلان طلب کر لیا،واسا کو میشنری اور افرادی قوت کی ضروریات سے آگاہ کرنے کی ہدایت کی۔

اجلاس میں فیصلہ کیا گیا کہ لاہور کے تمام علاقوں کو بتدریج واسا سروسز ایریا میں شامل کیا جائے گا۔ وزیراعلیٰ نےلاہور کے تمام واٹر فلٹر یشن پلانٹ فنکشنل کرنے کا حکم بھی دیا۔

وزیراعلیٰ مریم نواز نے کہا کہ ہر گلی محلے کو صاف دیکھنا چاہتی ہوں،صفائی کی مہم میں عوام بھی حکومت کا ساتھ دیں۔

اجلاس میں سینئر صوبائی وزیرمریم اورنگزیب،پرویز رشید،صوبائی وزیر اطلاعات و ثقافت عظمیٰ زاہد بخاری، صوبائی وزیر لوکل گورنمنٹ اینڈ کمیونٹی ڈویلپمنٹ ذیشان رفیق،ایم پی اے ثانیہ عاشق،معاون خصوصی ذیشان ملک،چیف سیکرٹری، چیئرمین پی اینڈ ڈی، سیکرٹری ہاؤسنگ، کمشنر، ڈپٹی کمشنر اور متعلقہ حکام نے شرکت کی۔