لاہور میں تھیٹرز کی بندش کے خلاف درخواست پر تھیٹرز ایسوسی ایشن کا لیٹر ہیڈ نہ ہونے کا اعتراض عائد

لاہور ہائیکورٹ  نے  تھیٹروں کی بندش کے خلاف درخواست پر تھیٹرز ایسویسی ایشن کا اتھارٹی لیٹر فراہم کرنے کی ہدایت کر دی ہے ۔

لاہور ہائیکورٹ کے جسٹس چوہدری محمد اقبال نے پنجاب آرٹسٹ پروڈیوسر تھیٹرز ایسوسی ایشن کی درخواست پر سماعت کی، درخواست میں تھیٹرز بند کرنے کی حکومتی کارروائی کو چیلنج کیا گیا۔ سماعت کے دوران عدالت نے نشاندہی کی کہ درخواست گزار تنظیم کا  اتھاڑتی لیٹر ساتھ نہیں لگایا گیا۔

عدالت نے ہدایت کی کہ پہلے ایسوسی ایشن کا اتھارٹی لیٹر درخواست کے ساتھ لگایا جائے۔ درخواست میں نشاندہی کی گئی کہ کمشنر لاہور  بغیر کسی قانونی جوازکے تھیٹرز بند کر رہے ہیں اور تھیٹرز کو فحاشی کا نام دیکر کارروائی کی جا رہی ہے۔

درخواست میں وضاحت کی گئی کہ تھیٹرز میں کسی قسم کی فحاشی نہیں ہورہی بلکہ شہریوں کو صاف ستھری تفریح فراہم کی جارہی ہے۔ تھیٹرز کی بندش سے مالکان، فنکاروں اور عملے کومعاشی مشکلات کا سامنا ہے۔۔

درخواست میں استدعا کی گئی کہ تھیٹرز کیخلاف حکومتی کارروائی روکتے ہوئے تھیٹرز فوری کھولنے کا حکم دیا جائے۔