بلوچستان کے ضلع کیچ، پنجگور اور ژوب میں سکیورٹی فورسز کے آپریشن، 5 دہشتگرد ہلاک

بلوچستان میں معصوم شہریوں کو نشانہ بنانے والے دہشت گردوں کے خلاف کارروائیاں جاری ہیں ۔آئی ایس پی آر کے مطابق ضلع کیچ،پنجگور اور ژوب میں سکیورٹی فورسز نے تین الگ الگ آپریشنز میں 5 دہشت گردوں کو جہنم واصل کردیا۔شدید فائرنگ کے تبادلے میں 3 دہشت گرد زخمی ہوئے۔

پاک فوج کے شعبہ تعلقات عامہ ( آئی ایس پی آر) کے مطابق 26 اگست کو بلوچستان میں معصوم شہریوں کو نشانہ بنانے والی بزدلانہ دہشت گردی کی کارروائیوں کے پس منظر میں، سیکورٹی فورسز ان گھناؤنی کارروائیوں کے مرتکب افراد کی تلاش کے لیے وسیع انٹیلی جنس پر مبنی آپریشنز (IBOs) کر رہی ہیں۔
29/30 اگست کی رات، ضلع کیچ، پنجگور اور ژوب میں تین الگ الگ آئی بی اوز میں، پانچ دہشت گردوں کو سیکورٹی فورسز نے جہنم واصل کیا، جب کہ شدید فائرنگ کے تبادلے میں تین دہشت گرد زخمی ہوئے۔
کارروائیاں اس وقت تک جاری رہیں گی جب تک ان ظالمانہ کارروائیوں میں ملوث تمام مجرموں، سہولت کاروں اور معاونین کو انصاف کے کٹہرے میں نہیں لایا جاتا۔
پاکستان کی سیکورٹی فورسز قوم کے شانہ بشانہ بلوچستان کے امن، استحکام اور ترقی کو سبوتاژ کرنے کی کوششوں کو ناکام بنانے کے لیے پرعزم ہیں۔