اوریا مقبول جان کو 14 روزہ ریمانڈ پر جیل بھجوا دیا گیا

لاہور کی مقامی عدالت نے تجزیہ نگار اوریا مقبول جان کیخلاف سائبر کرائم کا مقدمہ میں ان کا مزید جسمانی ریمانڈ دینے کی درخواست مسترد کر دی اور انہیں جوڈیشل ریمانڈ پر جیل بھیج دیا۔

ایف آئی اے نے اوریا مقبول جان کا 4 دنوں کا جسمانی ریمانڈ ختم ہونے پر ضلع کچہری میں جوڈیشل مجسٹریٹ کے سامنے پیش کیا اور جسمانی ریمانڈ میں توسیع کیلئے درخواست دی۔

ایف آئی اے کے مطابق سابق بیورو کریٹ اور تجزیہ نگار اوریا مقبول جان سے ابھی تفتیش مکمل نہیں ہوئی اس لیے چھان بین کیلئے مزید 6 دنوں کا جسمانی دیا جائے۔

اوریا مقبول جان کے وکلا اظہر صدیق اور میاں علی اشفاق نے جسمانی ریمانڈ کی مخالفت کی اور اسے بلاجواز قرار دیا. جوڈیشل مجسٹریٹ ثروت بتول نے دونوں طرف کے دلائل سننے کے بعد ایف آئی اے کی درخواست پر فیصلہ محفوظ کیا اور بعد میں ایف آئی اے کی درخواست مسترد کر دی. عدالت نے حکم دیا کہ 14 دنوں کا جوڈیشل ریمانڈ ختم ہونے پر اوریا مقبول جان کو دوبارہ پیش کیا جائے۔

اوریا مقبول جان کیخلاف مذہبی منافرت پھیلانے پر سائبر کرائم کے تحت مقدمہ درج کیا گیا اور وہ 8 دنوں تک جسمانی پر ایف آئی اے کی تحویل میں رہے۔