اینٹی نارکوٹکس فورس کی پاسنگ آؤٹ پریڈ، 16 خواتین سمیت 129 ٹرینیز پاس آؤٹ ہوئے

اینٹی نارکوٹکس فورس کی پاسنگ آوٹ پریڈ کے دوران 16خواتین سمیت 129ٹرینیزپاس آوٹ ہوئے۔

ترجمان اے این ایف کے مطابق پاسنگ آؤٹ پریڈ کی تقریب  پولیس لائن اسلام آباد میں منعقد ہوئی، تقریب کے مہمان خصوصی ڈی جی،اے این ایف میجر جنرل محمد انیق الرحمان ملک ہلال امتیاز (ملٹری )تھے۔

16خواتین سمیت 129ٹرینیزکے بیج نے 28ہفتوں پرمحیط ٹریننگ مکمل کی، تربیت مکمل کرکے پاس آؤٹ ہونے والوں کا انتخاب میرٹ پر  87600 درخواست دہندگان میں سے کیاگیا۔

ڈائریکٹر جنرل اے این ایف میجر جنرل انیق الرحمان ملک نے پریڈ کا معائنہ کیا، پاسنگ آوٹ پریڈ کی تقریب میں ڈپٹی ڈی جی اے این ایف ڈاکٹر سہیل حبیب تاجک، آئی جی اسلام آباد اکبر ناصر خان بھی شریک تھے، تقریب میں اے این ایف کے سینئر افسران کے علاوہ غیر ملکی معززین، دیگر قانون نافذ کرنے والے اداروں کے افسران بھی شریک ہوئے۔

پاسنگ آوٹ پریڈ میں پاس آؤٹ ہونے والے افسران اور اہلکاروں کے اہل خانہ بھی موجود تھے، ڈی جی اے این ایف کی پاس آؤٹ ہونے والے افسران اوراہلکاروں کو  تربیت مکمل کرنے و پیشہ ورانہ کیریئر کے آغاز پرمبارکباد دی۔

ڈی جی اے این ایف نےتربیت کے دوران نمایاں کارکردگی پرافسران اور اہلکاروں کواعزازات سے نوازا،اے این ایف کے تربیت مکمل کرنے والے جوانوں نے ان آرمڈ بیٹل ومارشل آرٹ کا عملی مظاہرہ بھی کیا۔

تقریب میں پاکستان رینجرز پنجاب کے خصوصی ڈرل اسکواڈ کی جانب سے اپنے فن کا عملی مظاہرہ پیش کیا گیا،اے این ایف کے ویجلینس اسکواڈ نےموٹربائیکس پر پاسنگ آؤٹ پریڈ میں خصوصی شرکت کی،تقریب کے آخرمیں آئی جی پی اسلام آباد نےسی ٹی ڈی اسلام آباد کی جانب سے ڈی جی اے این ایف کو قومی پرچم پیش کیا۔