پشاور: پولیو ٹیم کی سکیورٹی پر مامور کانسٹیبل نامعلوم افراد کی فائرنگ سے ہلاک

پشاور میں نامعلوم افراد کی فائرنگ سے پولیس اہلکار جا ں بحق ہوگیا، پولیس کےمطابق شاہ نواز نامی کانسٹیبل سلیمان خیل سے پولیو ٹیم کی سکیورٹی ڈیوٹی کے لیے جارہاتھا۔مقتول کی علاقے میں دشمنی چلی آرہی تھی۔

وزیراعلیٰ خیبر پختونخوا علی امین خان گنڈاپور نے پولیس اہلکار کی شہادت پر اظہار افسوس اور شہید کے اہل خانہ سے دلی ہمدردی کا اظہار کیا ہے۔
وزیراعلیٰ نے پولیس کو فائرنگ میں ملوث عناصر کی فوری گرفتاری کیلئے اقدامات کی ہدایت کی اور پولیس حکام کو شہید کے ورثا کی مالی امداد کیلئے کارروائی عمل میں لانے کی ہدایت کی۔

علی امین گنڈا پور نے کہا کہ عوام کے جان و مال کے تحفظ کیلئے پولیس نے لازوال قربانیاں دی ہیں، پولیس جوانوں کی قربانیوں کو سلام پیش کرتے ہیں،ایسےبزدلانہ واقعات سے پولیس جوانوں کے حوصلے پست نہیں ہوں گے۔