پشاور: سکیورٹی فورسز کی گاڑی کے قریب خودکش دھماکہ، 10 زخمی

خیبرپختونخوا کے دارالحکومت پشاور کے علاقے حیات آباد میں سکیورٹی فورسز کی گاڑی کے قریب خودکش دھماکا ہوا ہے جس کے نتیجے میں 10 افراد زخمی ہوئے ہیں جن میں سے دو کی حالت تشویش ناک ہے۔

سپرنٹنڈنٹ آف پولیس (ایس پی) کینٹ وقاص رفیق کا کہنا ہے کہ حیات آباد میں خودکش حملہ آور نے گاڑی ایف سی کی گاڑی سے ٹکرائی۔ جس کے نتیجے میں 7 سیکیورٹی اہلکاروں سمیت 10 افراد زخمی ہوئے۔

پولیس کے مطابق دھماکے میں زخمی ہونے والوں کو فوری طور پر سی ایم ایچ منتقل کردیا گیا ہے۔

دھماکے کے بعد سیکیورٹی اہلکاروں نے علاقے کو گھیرے میں لے تحقیقات شروع کردی ہیں۔

حالیہ دنوں میں فورسز پر حملوں کی تعداد میں اضافہ ہوا ہے، پچھلے ہفتے ژوب گیریژن پر حملے میں 9 فوجی اہلکار شہید ہوئے تھے۔

اس سے پہلے بلوچستان کے علاقے بولار میں فورسز اور دہشتگردوں کے درمیان فائرنگ کے تبادلے می دو جوان شہید اور دو زخمی ہوئے تھے۔

مارچ میں پشاور کے کوچہ رسالدار کے علاقے میں خودکش  بم دھماکے کے نتجے میں 56 افراد ہلاک اور 200 زخمی ہوئے تھے۔