الیکشن ایکٹ ترمیم 2024 کے خلاف سپریم کورٹ میں پٹیشن دائر

الیکشن ایکٹ ترمیم 2024 کے خلاف پاکستان بار کونسل کے چھ ممبران نے سپریم کورٹ میں درخواست دائر کی ہے،درخواست میں الیکشن کمیشن، وزارت قانون اور وفاق پاکستان سمیت دیگر کو فریق بنایا گیا ہے،،درخواست میں استدعا کی گئی ہے کہ الیکشن ایکٹ میں حالیہ ترمیم کو کالعدم قرار دیا جائے،سپریم کورٹ وفاقی حکومت اور الیکشن کمیشن کو حالیہ ترمیم پر عملدرآمد روکنے کا حکم دے۔

درخواست میں کہا گیا کہ الیکشن ایکٹ میں حالیہ ترمیم آئین پاکستان کی مختلف شقوں سے متصادم ہے،الیکشن ایکٹ میں حالیہ ترمیم سے سپریم کورٹ کے فیصلے کو کالعدم قرار دینے کی کوشش کی گئی ہے۔

درخواست میں کہا گیا ہے کہ الیکشن ایکٹ میں ترمیم قانون کی حکمرانی، عدلیہ کی آزادی اور اختیارات کی تقسیم کے لیے خطرہ ہے،الیکشن ایکٹ میں کی گئی رمیم سپریم کورٹ کے 12 جولائی کو دیئے فیصلے کو ختم کرنے کی کوشش ہے۔

درخواست میں موقف اختیار کیا گیا کہ الیکشن ایکٹ میں ترمیم کا ماضی سے اطلاق سپریم کورٹ کے متعدد فیصلوں کی خلاف ورزی ہے،الیکشن ایکٹ میں کی گئی ترمیم کا سیکشن چار آزاد امیدواروں کے خلاف امتیازی رویہ اور آئین کے آرٹیکل 17 کی خلاف ورزی ہے، الیکشن ایکٹ میں کی گئی ترمیم کا مقصد ایک خاص سیاسی جماعت کو نشانہ بنانا ہے۔