برطانیہ کے لیے پی آئی اے کا براہ راست فلائٹ آپریشن بند لیکن عملہ تعینات، ماہانہ تین کروڑ روپے تنخواہ ادائیگی

برطانیہ میں براہ راست فلائٹ آپریشن پر پابندی کے باوجود پی آئی اے کا افسران و عملہ بھاری تنخواہوں پر لندن،برمنگھم اور مانچسٹر میں تعینات ہے۔

ذرائع کے مطابق قومی ائیر لائن کے برطانیہ میں فضائی آپریشن بند ہونے کے باوجود  کنٹری منیجر کو سالانہ 70 ہزار پاونڈ تنخواہ ادا کی جارہی ہے،پی آئی اے کے پسنجر سیلز منیجر کو سالانہ 55ہزار پاونڈز تنخواہ کی مد میں اداکیے جارہے ہیں،لندن میں تعینات پی ائی اے فنانس منیجر کی سالانہ 55ہزار برطانوی پاونڈ تنخواہ مقرر ہے،پی آئی اے برمنگھم، مانچسٹر اسٹیشنز پر تعینات منیجرز بھی سالانہ 55 ہزار پاونڈز اور دیگر سہولیات لے رہے ہیں۔

پی آئی اے کے برطانیہ میں تعینات افسران کی سالانہ تنخواہ پاکستانی روپے میں 3 کروڑ روپے کے لگ بھگ بنتی ہے۔

ترجمان پی آئی اے کا مذکورہ  معاملے پر کہنا ہے کہ برطانیہ میں پی آئی اے اپنا آپریشن کوڈ شیئرنگ کے تحت جاری رکھے ہوئے ہے،برطانیہ میں سالانہ بنیاد پر ایک کروڑ 40 لاکھ برطانوی پاؤنڈز آمدن ہورہی ہے،ترکش ائیرلائن کے ساتھ کوڈ شیئرنگ کے تحت برطانیہ میں پی آئی اے آپریشن جاری ہے،جس کی ٹکٹس فروخت ہورہی ہے،اس سسٹم کو چلانے کے لیے برطانیہ میں عملے کی تعیناتی ناگزیر ہے۔

ان کا کہنا ہے کہ پی آئی اے کا برطانیہ کے لیے براہ راست فلائٹ آپریشن بحالی کے جلد امکانات ہیں،اسی کے مدنظر برطانیہ میں کنٹری منیجر اور سیلز منیجرز رکھے ہوئے ہیں،کیونکہ آپریشن بحالی کی صورت میں عملے کی ہنگامی بنیادوں پر دوبارہ تعیناتی تیکنیکی لحاظ سے ایک دشوار اور پیچیدہ عمل ہے،ترجمان کا مذید کہنا ہے کہ پی آئی اے کی برطانیہ میں آمدنی کا صرف 1.8فیصد وہاں تعینات عملے پر خرچ کیا جارہا ہے۔