الیکشن کے اعلان کے بعد سیاسی سرگرمیوں پر پابندی نہیں ہونی چاہئے، لاہور ہائیکورٹ

پی ٹی آئی کی شاہدرہ میں جلسے کی اجازت کیلئے درخواست پر لاہورہائیکورٹ نے ریمارکس دیئے کہ الیکشن کی تاریخ کے اعلان کے بعد سیاسی سرگرمیوں پر پابندی نہیں ہونی چاہئے ،لاء آفیسر بتائے یہ کیا ہورہا ہے، کیا سیاسی سرگرمیوں کے حوالے سے کوئی پالیسی بنائی گئی ہے؟ ہدایات لے کر عدالت کو آگاہ کریں۔

جسٹس علی باقر نجفی نے پی ٹی آئی امیدوار اکمل باری این اے 117 کی درخواست پر سماعت کی۔ درخواست گزار نے موقف اپنایا کہ ملک میں عام انتخابات کا اعلان کردیا گیا ہے اور سیاسی سرگرمیاں شروع ہوگئی ہیں، درخواست گزار شاہدرہ این اے 117 سے پی ٹی آئی کا ٹکٹ ہولڈر ہے،12 نومبر کو شاہدرہ میں اپنے ڈیرہ پر جلسہ کرنا ہے،خدشہ ہے کہ پولیس جلسہ کرنے سے روک دیگی اور گرفتار کرلے گی،عدالت متعلقہ حکام کو جلسے کی اجازت دینےکا حکم دے۔ پی ٹی آئی امیدوار افضال عظیم پاہٹ ایڈووکیٹ کو جلسہ کرنے پر گرفتار کیا گیا، خدشہ ہے کہ درخواست گزار کو بھی کارنر میٹنگ کرنے پر گرفتار کرلیا جائیگا۔

جسٹس باقر علی نجفی نے ریمارکس دیئے کہ الیکشن کی تاریخ کذ اعلان ہوگیا ہے آپ کیوں عدالت آئے ہیں،

الیکشن کی تاریخ کے اعلان کے بعد سیاسی سرگرمیوں پر پابندی نہیں ہونی چاہئے،لاء آفیسر بتائیے یہ کیا ہورہا ہے،کیا سیاسی سرگرمیوں کے حوالے سے کوئی پالیسی بنائی گئی ہے،آپ ہدایات لے کر عدالت کو آگاہ کریں۔