کراچی میں کل سے پری مون سون بارشوں کے آغاز کا امکان

کراچی کے مضافات میں کل سے پری مون سون بارشوں کے آغاز کا امکان ہے، محکمہ موسمیات کے مطابق 22 اور 23 جون کو کراچی کے مضافاتی علاقوں بحریہ ٹاؤن، سرجانی اور ایم نائن موٹر وے کے اطراف شام کے وقت گرج چمک کے ساتھ آندھی اور ہلکی بارش متوقع ہے جبکہ اس دوران حیدرآباد اور ٹھٹھہ کے مختلف علاقوں میں بھی آندھی کے ساتھ کہیں ہلکی کہیں تیز بارش کا امکان ہے۔

محکمہ موسمیات کے مطابق کراچی کا موسم آئندہ چند روز کے دوران گرم اور مرطوب رہنے کا امکان ہے، اس دوران شہر کا درجہ حرارت 38 ڈگری سینٹی گریڈ جبکہ ہوا میں نمی کا تناسب 80 فیصد تک رہنے کا امکان ہے۔

محکمہ موسمیات کا کہنا ہے کہ سندھ میں مون سون کا آغاز جولائی کے پہلے ہفتے سے ہونے کا امکان ہے ، رواں سال کراچی سمیت سندھ بھر میں مون سون بارشیں معمول سے زیادہ ہونے کی توقع ہے۔