بجلی کا یونٹ 7 روپے 50 پیسے تک مہنگا کرنے کی تیاری، اطلاق جولائی کے بلوں سے ہوگا

پاور ڈویژن نے بجلی کے بنیادی ٹیرف میں سات روپے 50 پیسے فی یونٹ تک اضافے کی درخواست نیپرا میں جمع کروائی ہے۔

منظوری کی صورت میں بجلی کا زیادہ سے زیادہ فی یونٹ 50 روپے سے بڑھ جائے گا۔ بجلی کی قیمتوں میں اضافے کا اطلاق یکم جولائی سے کرنے کی تجویز زیر غور ہے۔

اس سے قبل نیپرا نے بجلی کا بنیادی ٹیرف چار روپے چھیانوے پیسے فی یونٹ تک بڑھانے کی منظوری دی تھی۔

واضح رہے کہ کابینہ نے بجلی کا بنیادی ٹیرف 3 روپے سے ساڑھے سات روپے فی یونٹ تک بڑھانے کی منظوری دی ہے۔

پاور ڈویژن کی دستاویز کے مطابق ماہانہ 100 یونٹ استعمال کرنے والے صارفین کے لیے بجلی فی یونٹ 3 روپے مہنگی کرنے کی تجویز ہے، 101 سے 200 یونٹ استعمال کرنے والے صارفین کے لیے یونٹ 5 روپے مہنگا کئے جانے کی تجویز ہے۔

ایسے صارفین جو 201 سے 300 یونٹ تک ماہانہ بجلی خرچ کرتے ہیں ان کے لیے فی یونٹ 5 روپے اضافہ تجویز کیا گیا ہے جبکہ 301 سے 400 یونٹ استعمال کرنے والوں کے لیے فی یونٹ 6 روپے 50 پیسے اضافہ کیا جائے گا۔

وہ صارفین جو ماہانہ 400 سے 700 یونٹ استعمال کرتے ہیں ان کے لیے 7 روپے فی یونٹ اضافہ تجویز کیا گیا ہے۔

درخواست پر نیپرا کے فیصلے کے بعد ٹیرف میں اضافے کا باقاعدہ نوٹیفیکیشن جاری کیا جائے گا۔

حکام کے مطابق لائف لائن صارفین بجلی کی قیمتوں میں اضافے سے مستثنیٰ ہوں گے جبکہ ماہانہ 200 یونٹ تک پروٹیکٹڈ صارفین کے لیے بھی قیمت میں اضافہ نہیں ہوگا۔