پنجاب پولیس کو چھاپوں کے دوران باڈی کیم استعمال کرنے کی ہدایات

وزیراعلیٰ پنجاب مریم نواز کے ساتھ ملاقات کے بعد آئی جی پنجاب نے احکامات جاری کئے ہیں کہ پنجاب پولیس اب ہر ریڈ کی ویڈیو بنائے گی، ریڈز کے دوران باڈی کیم کا استعمال کیا جائے،جہاں باڈی کیم دستیاب نہیں وہاں موبائل فون سے ویڈیوبنائی جائے۔

وزیراعلیٰ کی ہدایات کی روشنی میں آئی جی پنجاب نے حکم دیا ہے کہ ایف آئی آر کے اندراج میں کسی صورت میں تاخیر نہیں ہونی چاہئے،پولیس افسران واہلکار کسی بھی جگہ پر اختیارات سے تجاوز نہ کریں۔

پولیس سربراہ نے حکم دیا کہ پولیس افسر کی جانب سےراولپنڈی میں خاتون پر تشدد جیسے واقعات برداشت نہیں کئے جائیں گے،بچوں کے ساتھ زیادتی وبدفعلی کے واقعات کو خود افسران مانیٹر کریں۔

ڈرائیونگ لائسنس بروقت بنانے اور سفارشی کلچرکا خاتمہ کرنے کی بھی ہدایت کی گئی ہے۔

پولیس حکام کو ہدایت کی گئی کہ افسران خدمت مراکز کو مزیدبہتر بنانے اور سروس ڈلیوری کا معیار یقینی بنانے کےلئے خودوزٹس کریں۔ کرائم کنٹرول کرنے کےلئے پٹرولنگ کا عمل مزید موثر بنایا جائے۔

آئی جی پنجاب نے تمام آر پی اوز اور ڈی پی اوز کو احکامات جاری کئے۔