لاہور میں بارش، ملک بھر میں آج سے پری مون سون سیزن کا آغاز، ہیٹ سٹروک 7 زندگیاں لے گئی

پنجاب کے کئی شہروں میں پری مون سون بارشیں شروع ہو گئی ہیں،لاہور کےمتعدد مقامات پر بادل کھل کر برسے۔

محکمہ موسمیات  نے آج سےتیس جون تک   بیشتر علاقوں میں گرج چمک کے ساتھ بارش کی خبر  سنائی ہے۔ تیس جون تک اسلام آباد۔راولپنڈی۔لاہور سمیت پنجاب کے مختلف شہروں میں  پری مون سون  بارشیں ہوں گی۔

کشمیر ۔گلگت بلتستان اور خیبرپختونخوا میں بھی  تیزہواؤں اور گرج چمک کے ساتھ  بارش کاامکان ہے۔ شدید بارشوں کے باعث اربن فلڈنگ اور پہاڑی علاقوں میں لینڈسلائیڈنگ  کا خدشہ بھی ظاہر کیاگیاہے۔

گزشتہ کچھ روز سے پڑنےو الی  گرمی  نے شہریوں کو  بےحال کئے رکھا۔ ملک بھر میں ہیٹ اسٹروک سے سات افراد جان کی بازی ہار گئے۔ اسلام آباد میں پانچ افراد کی جان چلی گئی۔لاہور میں گرمی سے دو افراد جاں بحق ہوئے۔

وفاقی وزیر برائے ماحولیاتی تبدیلی  سینیٹر  شیری رحمان نے کہا ہے کہ محکمہ موسمیات نے آج سے 30 جون تک ملک بھر میں پری مون سون بارشوں کی پیش گوئی کی ہے،پری مون سون بارشوں کی وجہ سے موجودہ شدید گرمی کی لہر میں کمی کا امکان ہے۔

شیری رحمان نے ٹویٹر پر لکھا کہ 25 سے30جون کےدرمیان اسلام آباداورراولپنڈی سمیت پنجاب کےمختلف شہروں میں موسلادھاربارش کا امکان ہے،کشمیر، گلگت بلتستان اور خیبر پختون خواہ میں تیز ہواؤں، گرج چمک اور موسلادھار بارش کی توقع ہے۔

شیری رحمان نے لکھا کہ بلوچستان، جنوبی پنجاب اور سندھ کے مختلف شہروں میں 26 جون سے 29 جون آندھی اور بارش متوقع ہے، شدید بارشوں سے اربن فلڈنگ جبکہ پہاڑی علاقوں میں سیلاب اور لینڈ سلائیڈنگ کا اندیشہ ہے،تمام متعلقہ اور مقامی اداروں کو الرٹ رہنے اور سیاحوں کو محتاط رہنے کی ہدایت جاری کی گئی ہیں۔