17 بار عسکریت پسندوں کے حملوں کا نشانہ رہنے والے سرفراز بگٹی بلامقابلہ وزیراعلیٰ بلوچستان منتخب

پیپلز پارٹی سے تعلق رکھنے والے میر سرفراز بگٹی بلوچستان کے بلا مقابلہ وزیر اعلیٰ منتخب ہوگئے، وزیر اعلیٰ کے لیے کاغذات نامزدگی کا وقت 5 بجے مقرر کیا گیا تھا، سرفراز بگٹی کے مقابلے میں کسی بھی امیدوار نے کاغذات نامزدگی جمع نہیں کروائے۔

میر سرفراز بگٹی 1981میں بگٹی قوم کے ممتاز قبائلی سیاسی رہنما چیف آف بگٹی میر غلام قادر بگٹی کے ہاں پیدا ہوئے میر سرفراز بگٹی نے لارنس  کالج مری سے اپنی تعلیم مکمل کی، میرسرفرازبگٹی کے والد(مرحوم) میرغلام قادر بگٹی نے 1988میں پیپلز پارٹی میں باقاعدہ شمولیت اختیار کی، (مرحوم) میرغلام قادر بگٹی  اپنی تمام زندگی پیپلز پارٹی کے پلیٹ فارم سے سیاسی جدوجہد کرتے رہے۔(مرحوم) میرغلام قادر بگٹی مشرف دور میں پیپلز پارٹی سے رفاقت کے باعث زیر عتاب بھی رہے۔

میرسرفراز بگٹی سال 2013میں پہلی بار رکن بلوچستان اسمبلی منتخب ہوئے سابق وزراء اعلیٰ ڈاکٹر عبدالمالک بلوچ اور نواب ثناء اللہ زہری کی حکومتوں میں بحیثیت وزیرداخلہ اپنی خدمات پیش کیں۔

صوبائی وزیر داخلہ کی حیثیت سے میر سرفراز بگٹی نے امن وامان کی قیام کے لئے بے شمار اقدامات اٹھائے، لیویز فورس کو جدید خطوط پر آراستہ کیا، بلوچستان پولیس کو اپنے دور اقتدار میں سیاسی اثر ورسوخ کے دباؤ سے نجات دلائی۔

میر سرفرازبگٹی نے ہمیشہ پاکستان مخالف ایجنڈے کی نفی کرتے ہوئے ملوث عناصر کے خلاف اعلان بغاوت بلند رکھا۔میر سرفرازبگٹی پر 17بار امن دشمنوں کی جانب سے حملے کئے گئے، امن دشمنوں کے حملوں کے دوران میر سرفراز بگٹی کے متعدد دیرینہ ساتھیوں اوراقارب نے اپنی جانوں کے نذرانے پیش کئے۔

2018کے عام انتخابات میں میر سرفرازبگٹی نے حصہ لیا تاہم انتخابات میں ناکام ہوئے، 2018میں سینیٹر منتخب ہوئے، سینیٹ میں بلوچستان کی ہمیشہ توانا آواز ثابت ہوئے، 2021میں دوبارہ سینیٹر منتخب ہوکر ایوان بالا کا حصہ بنے، 2023میں بننے والے نگران سیٹ اپ میں بحثیت وفاقی وزیر داخلہ اپنی خدمات پیش کی۔

بحیثیت نگران وفاقی وزیر داخلہ میر سرفرازبگٹی نے مملکت خداد پاکستان کا مثبت چہرہ دنیا کے سامنے لانے کے لئے ہر فارم پر آواز بلند کی۔ حالیہ 2024کے انتخابات میں پاکستان پیپلز پارٹی کے پلیٹ فارم سے بھاری اکثریت سے کامیاب ہوکر رکن بلوچستان اسمبلی  منتخب ہوئے۔