سابق وزرا، عہدیداروں سے سکیورٹی، پروٹوکول اور مراعات واپس لی جائیں، الیکشن کمیشن کا چیف سیکرٹری، آئی جی سندھ کو خط

الیکشن کمیشن نے بالآخر سندھ میں وفاقی بیوروکریسی کے دو اعلیٰ عہدیداروں – چیف سیکریٹری اور انسپکٹر جنرل آف پولیس – کو سابق صوبائی کابینہ کے اراکین اور مساوی حیثیت کے سیاسی عہدیداروں سے پروٹوکول، سکیورٹی، اور مراعات واپس لینے کی ہدایت کی ہے۔ اور تعمیل کی رپورٹ تین دن کے اندر شیئر کرنے کی ہدایت کی ہے۔

الیکشن کمیشن کی جانب سے سندھ کے چیف سیکریٹری فخر عالم عرفان اور آئی جی پی رفعت مختار راجہ کو  ایک خط میں کہا گیا ہے کہ یہ بات معزز کمیشن کے نوٹس میں لائی گئی ہے کہ صوبائی کابینہ کے سابق اراکین اور مساوی حیثیت کے سیاسی عہدیدار اپنے سابقہ عہدوں کی وجہ سے پروٹوکول، سکیورٹی اور مراعات کا استعمال جاری رکھے ہوئے ہیں۔

خط میں ای سی پی کی جانب سے اس سال 15 اگست کو جاری کردہ رہنما خطوط کا حوالہ دیا گیا، جس میں پولنگ باڈی نے متعلقہ حکام کو سابق وزیر اعظم، سابق وزرائے اعلیٰ اور ان کے مشیروں، سابق وزراء سے سرکاری رہائشی سہولیات خالی کرانے کو یقینی بنانے کی ہدایت کی تھی۔

خط میں کہا گیا کہ اس طرح، آپ کو مشورہ دیا جاتا ہے کہ صوبائی کابینہ کے ان سابق ممبران اور مساوی حیثیت کے سیاسی عہدیداروں سے پروٹوکول/سکیورٹی اور اور مراعات واپس لیں، اور تین دن کے اندر تعمیل کا نوٹ بھیجیں۔ اس معاملے کو انتہائی ضروری سمجھا جاتا ہے۔

سابق صوبائی حکمراں جماعت ان دنوں ای سی پی پر سخت تنقید کر رہی ہے کہ وہ آئینی طور پر مقرر کردہ 90 دن کی مدت کے اندر ملک میں عام انتخابات کے بروقت انعقاد کو یقینی بنانے میں ناکام رہی۔