شاداب خان پی ایس ایل 9 ٹیم کے کپتان مقرر، ملتان سلطانز کے 5 کھلاڑی شامل

شاداب خان کو ایچ بی ایل پی ایس ایل 9 کی ٹیم کے کپتان مقررکردیا گیا، ٹیم میں ملتان سلطانز کے پانچ اسلام آباد یونائیٹڈ کے تین, پشاور زلمی کے دو اور کراچی کنگز کا ایک کھلاڑی شامل ہے۔

اس ٹیم کا انتخاب ایک پینل نے کیا جس کی سربراہی ڈائریکٹر انٹرنیشنل کرکٹ عثمان واہلہ کر رہے تھے ،اس کے آزاد ارکان میں کمنٹیٹر ڈینی موریسن، مارک بوچر، عروج ممتاز اور طارق سعید شامل تھے۔

سلیکشن کے عمل کے دوران آزاد پینل نے ٹی ٹوئنٹی کرکٹ کے مختلف پہلوؤں پر غور کیا ،25 سالہ شاداب کی کپتانی میں اسلام آباد یونائیٹڈ نے ایچ بی ایل پی ایس ایل کا تیسرا ٹائٹل جیتا۔ شاداب کے ساتھ، اسلام آباد یونائیٹڈ کے دو کھلاڑی  عماد وسیم اور نسیم شاہ نے بھی  ٹیم میں جگہ بنائی ہے۔

ملتان سلطانز کے پانچ کھلاڑی پلیئنگ الیون میں شامل ہیں جن میں تین غیر ملکی کھلاڑی شامل ہیں۔ عثمان خان، کرس جارڈن اور ڈیوڈ ولی کے علاوہ اسامہ میر اور افتخار احمد ہیں۔

ملتان سلطانز کے کپتان محمد رضوان 12ویں کھلاڑی قرار پائے۔ٹیم میں کراچی کنگز کے ایمرجنگ کیٹگری کے کھلاڑی عرفان خان بھی شامل ہیں۔

پشاور زلمی کی اوپننگ جوڑی بابر اعظم اور صائم ایوب نے بھی ٹیم میں جگہ بنائی۔