بینک کرپٹ ملک سری لنکا میں مہنگائی کی شرح میں حیران کن کمی

بینک کرپٹ ملک سری لنکا میں مہنگائی میں حیرت انگیکز کمی آئی ہے، جون میں مہنگائی کی شرح میں 25.2 سے کم ہو کر 12 فیصد پر آ گئی۔ یہ سری لنکا کے دیوالیہ ہونے کے بعد مہنگائی کی کم ترین شرح ہے۔

سری لنکا اپنے 46 ارب ڈالر بیرونی قرضے پر اپریل 2022 میں ڈیفالٹ کر گیا تھا اور عوام مہینوں تک خوراک، ایندھن اور ادویات کی قلت کا سامنا کرتے رہے۔

آئی ایم ایف کی طرف سے اس سال مارچ میں 2.9 ارب ڈالرز کا بیل آؤٹ پیکج ملنے کے بعد بحران میں کمی آئی ہے۔

سری لنکا میں پچھلے سال ستمبر میں مہنگائی 69.8 فیصد تھی اور مئی میں 25.2 فیصد رہی، سری لنکا کے مرکزی بینک کا کہنا ہے کہ 2023 کی تیسری سہ ماہی میں مہنگائی کی شرح کم ہو کر سنگل ڈیجٹ میں آجائے گی۔

سری لنکا کے مرکزی بینک نے اس ہفتے قرض ری سٹرکچرنگ کا پروگرام پیش کیا اور قرض دہندگان سے قابل ادا قرضوں میں 30 فیصد کمی کا مطالبہ کیا۔