تائیوان کے لیے اسلحہ سپلائی تیز کرنے کی ضرورت ہے، امریکی جنرل

امریکی افواج کے چیئرمین جوائنٹ چیفس آف سٹاف جنرل مارک میلی نے کہا ہے کہ امریکا اور اتحادیوں کو اگلے چند برسوں کے دوران تائیوان کے لیے اسلحہ فراہمی تیز کرنے کی ضرورت ہے تاکہ وہ اپنا دفاع کرنے کے قابل ہوسکے۔

امریکا تائیوان کا سب سے اہم اسلحہ سپلائر ہے، بیجنگ نے بارہا مطالبہ کیا ہے کہ واشنگٹن تائیوان کو اسلحہ کی فروخت روک دے۔

ٹوکیو کے دورے کے دوران صحافیوں سے بات کرتے ہوئے جنرل مارک میلی نے کہا کہ امریکا اور دیگر ملک جس رفتار سے تائیوان کو اسلحہ فراہم کر رہے ہیں، میرے خیال میں اگلے چند برسوں میں اس رفتار کو بڑھانے کی ضرورت ہے۔

جنرل مارک میلی نے کہا کہ تائیوان کو ایئرڈیفنس سسٹم اور ایسے اسلحہ کی ضرورت ہے جو زمین سے بحری جہازوں کو نشانہ بنا سکے۔

جنرل مارک میلی نے کہا کہ میرے خیال میں تائیوان کی فوج اور ان کی دفاعی صلاحیتوں کو بہتر بنانے کی ضرورت ہے۔

تائیوان پچھلے برس سے امریکا کی طرف سے اسلحہ کی فراہمی میں تاخیر کی شکایت کر رہا ہے،تائیوان کو سٹنگر اینٹی ایئرکرافٹ نہیں مل پا رہے کیونکہ اسلحہ یوکرین کو بھجوایا جا رہا ہے۔ اس معاملے پر کئی ارکان کانگریس بھی تشویش کا اظہار کر چکے ہیں۔

جنرل مارک میلی نے کہا کہ امریکا اور چین کے تعلقات ’ انتہائی نچلی سطح‘ پر ہیں اور وزیر خارجہ انٹنی بلنکن، وزیر خزانہ جینیٹ ییلن کے حالیہ دورے تصادم کے امکانات کم کرنے کے لیے اہم ہیں۔

جنرل مارک میلی نے کہا کہ امریکا ایشیا پیسفک میں اپنی فوج کی تعیناتیوں میں تبدیلیوں کی ضرورت پر غور کر رہا ہے۔

خطے میں امریکی افواج کا بڑا حصہ جنوب مشرقی ایشیا میں تعینات ہے، 28 ہزار 500 امریکی فوجی جنوبی کوریا اور 56 ہزار جاپان میں تعینات ہیں۔

جنرل مارک میلی نے کہا کہ ہم خطے میں متبادل بیس آپشن تلاش کر رہے ہیں۔