سمندروں کو آلودگی سے بچانے کے اقدامات کر رہے ہیں، سربراہ پاک بحریہ کا ورلڈ میری ٹائم ڈے پر پیغام

ورلڈ میری ٹائم ڈے کے موقع پر چیف آف دی نیول اسٹاف ایڈمرل محمد امجد خان نیازی نے اپنے  پیغام میں کہا کہ اس دن کامقصدانٹرنیشنل میری ٹائم آرگنائزیشن کے تحت سمندری آلودگی کی روک تھام اور ماحولیات کے تحفظ کو یقینی بنانا ہے،میں امید کرتا ہوں کہ تمام اسٹیک ہولڈرزسمندری تحفظ کے اصولوں پر متحرک اور اجتماعی طور پر عمل پیرا ہوں گے۔

ورلڈ میری ٹائم ڈے کے موقع پر چیف آف دی نیول اسٹاف کا اپنے  پیغام میں کہنا  تھا کہ رواں برس اس دن کا موضوع ‘مارپول کے پچاس سال، ہمارا عزم جاری ہے’  رکھا گیاہے،سمندرکی حفاظت، سلامتی اور ماحولیاتی تحفظ کی یاد دہانی کے لیے میری ٹائم کا عالمی دن ہر سال منایا جاتا ہے، یہ دن جہازوں سے پھیلنے والی آلودگی کی روک تھام کے لیے بین الاقوامی کنونشن مارپول (MARPOL) کی پچاسویں سالگرہ کے طور پر بھی منایا جا رہا ہے۔

سربراہ پاک بحریہ نے کہا کہ پاک بحریہ سمندری ماحول کے تحفظ کیلئے پیش پیش ہے،مارپول کی پانچ دہائیوں پر محیط تاریخ سمندری آلودگی کے خلاف ہماری کوششوں اور کرۂ ارض کی حفاظت کی علامت ہے، انہوں نے مزید کہا کہ پاک بحریہ اپنے بحری جہازوں سے زہریلے دھویں کے اخراج کو کم کرنے اور بحری آلودگی سے بچاؤ کے  اقدامات سنجیدگی سے کر رہی ہے، آج کے دن میں پاک بحریہ میں میری ٹائم سیفٹی کو یقینی بنانے اور ماحولیاتی مینڈیٹ کو برقرار رکھنے کے عزم کا اعادہ کرتا ہوں۔۔