افغان طالبان نے سویڈن کو ملک میں جاری تمام سرگرمیاں روکنے کا حکم دے دیا

افغانستان کی طالبان حکومت نے سویڈن میں قرآن نذرآتش کرنے کے واقعہ کے بعد سویڈن کو افغانستان میں تمام سرگرمیاں روک دینے کو کہا ہے۔

افغان طالبان کی حکومت کے ترجمان ذبیح اللہ مجاہد نے ایک بیان میں کہا کہ قرآن پاک کی بیحرمتی اور مسلم عقائد کی توہین کی اجازت دینے کے بعد افغانستان کی اسلامی حکومت نے سویڈن کی افغانستان میں تمام سرگریاں روکنے کا حکم دیا ہے۔

افغانستان پر 2021 میں طالبان کے قبضے کے بعد سے سویڈن کا کابل میں سفارتخانہ نہیں ہے، اس لیے طالبان حکومت کا یہ حکم سویڈن کی این جی اوز پر اثرانداز ہوگا جن کے ہزاروں امدادی کارکن افغانستان کے صحت، تعلیم اور دیہی ترقی کے شعبوں میں کام کر رہے ہیں۔

طالبان حکومت نے وضاحت نہیں کی کہ اس کے حکم سے کون سی تنظیمیں اور ادارے متاثر ہوں گے، افغانستان میں خواتین امدادی کارکنوں سمیت امدادی کاموں پر کئی طرح کی پابندیاں عائد ہیں جس سے امدادی شعبہ پہلے ہی متاثر ہے۔ اقوام متحدہ کے مطابق امداد دینے والے ملک بھی افغانستان کے لیے امداد میں کمی کر رہے ہیں۔