کراچی کے گداگروں کا تنازع عدالت پہنچ گیا

کراچی میں گداگر گروپوں کا تنازع عدالت پہنچ گیا، امیر خاتون نام کی بھکارن بلدیہ کے علاقے سعید آباد میں فٹ پاتھ پر بھیک مانگتی ہے۔

سٹی کورٹ کے ایڈیشنل سیشن جج کی عدالت میں خاتون بھکاری نے تین بھکاریوں کے خلاف مقدمہ دائر کرنے کی درخواست کی۔

خاتون نے درخواست میں موقف اختیار کیا کہ علاقے میں شفیع ، نزیر اور میر گل سمیت چار بھکاریوں کی جانب سے اسے گن پوائنٹ پر ہراساں کیا گیا،اس نے متعلقہ تھانے میں ایف آئی آر درج کرانے کے لیے رجوع کیا تاہم پولیس نے مقدمے کے اندراج سے انکار کردیا۔

پولیس نے عدالت کو بتایا کہ علاقے میں بھکاری گروہوں کے درمیان اکثر بھیک مانگنے کی جگہ کا تنازع رہتا ہے اور یہ گروہ اپنے علاقے کو بنیاد بنا کر آپس میں لڑتے رہتے ہیں۔

عدالت نے خاتون گداگر کی درخواست مسترد کردی، اپنے ریمارکس میں عدالت نے کہا کہ غریبوں سے ہمدردی ہے تاہم عدالت کسی غیر قانونی مانگ سے متعلق فیصلہ نہیں دے سکتی، قانونی طور پر گداگری کے لیے  مخصوص جگہ کا دعویٰ نہیں کیا جاسکتا ۔