اسرائیلی طیاروں نے غزہ کا پورا ضلع ملیا میٹ کردیا،علاقہ چھوڑنے کے لیے صرف 30 منٹ کی مہلت، چرچ بھی تباہ

اسرائیل نے آبادی کو فرار ہونے کی آدھے گھنٹے کی وارننگ دینے کے بعد جمعہ کے روز شمالی غزہ کے ایک ضلع  کو ملیا میٹ کر دیا، اور ایک آرتھوڈوکس عیسائی چرچ کو بھی نشانہ بنایا جہاں لوگ پناہ لیے ہوئے تھے۔

اسرائیل نے غزہ پر حکمرانی کرنے والے گروپ حماس کا صفایا کرنے کا عزم ظاہر کیا ہے، وزیر دفاع یوو گیلنٹ نے جمعرات کو غزہ کی سرحد پر جمع ہونے والے فوجیوں سے کہا کہ "آپ اب غزہ کو دور سے دیکھ رہے ہیں، آپ اسے جلد ہی اندر سے دیکھیں گے۔

اسرائیل نے غزہ پر فضائی حملے کیے ہیں اور انکلیو کے 2.3 ملین افراد کو مکمل محاصرے میں لے رکھا ہے، یہاں تک کہ خوراک، ایندھن اور طبی سامان کی ترسیل پر بھی پابندی لگا دی ہے۔ فلسطینی حکام کا کہنا ہے کہ 7 اکتوبر سے اب تک 3,785 فلسطینی ہلاک ہو چکے ہیں جن میں 1,500 سے زیادہ بچے بھی شامل ہیں۔ اقوام متحدہ کا کہنا ہے کہ دس لاکھ سے زیادہ بے گھر ہو چکے ہیں۔

اسرائیل نے پہلے ہی تمام شہریوں سے کہا ہے کہ وہ غزہ کی پٹی کے شمالی نصف حصے کو خالی کر دیں، جس میں غزہ سٹی بھی شامل ہے۔

یروشلم کے مرکزی فلسطینی عیسائی فرقے آرتھوڈوکس نے کہا کہ اسرائیلی فورسز نے غزہ شہر میں چرچ آف سینٹ پورفیریس پر حملہ کیا، جہاں سینکڑوں عیسائی اور مسلمان پناہ گزینوں کی تلاش میں تھے۔

جائے وقوعہ سے ویڈیو میں دکھایا گیا ہے کہ ایک زخمی لڑکے کو رات کے وقت ملبے سے نکالا جا رہا ہے۔ سول ڈیفنس کے ایک کارکن نے بتایا کہ بالائی منزل پر دو لوگ بچ گئے تھے۔ جو لوگ نچلی منزل پر تھے وہ مارے جا چکے تھے اور ان کی لاشیں ابھی تک ملبے میں ہیں۔

"انہوں نے محسوس کیا کہ وہ یہاں محفوظ رہیں گے۔ وہ بمباری اور تباہی سے  بچنےآئے تھے، انہوں نے سوچا وہ یہاں محفوظ رہیں گے لیکن تباہی نے ان کا پیچھا کیا،” ایک آدمی نے کہا۔

غزہ میں حماس کے زیر انتظام سرکاری میڈیا آفس نے کہا کہ 18 عیسائی فلسطینی مارے گئے ہیں۔ مرنے والوں کی حتمی تعداد کے بارے میں چرچ کی طرف سے فوری طور پر کوئی تفصیل نہیں آئی۔

اسرائیلی فوج کا کہنا ہے کہ عسکریت پسندوں کے کمانڈ سینٹر پر حملے میں چرچ کے ایک حصے کو نقصان پہنچا ہے اور وہ واقعے کا جائزہ لے رہی ہے۔

غزہ کے ایک شمالی قصبے زہرہ میں رہائشیوں نے بتایا کہ ان کے پورے ضلع میں تقریباً 25 کثیر المنزلہ اپارٹمنٹس کی عمارتیں زمین بوس ہو گئیں۔

انہیں ناشتے کے وقت اپنے موبائل فون پر اسرائیلی دھمکی کے پیغامات موصول ہوئے، جس کے دس منٹ بعد ایک چھوٹا ڈرون حملہ ہوا جس نے پیغام ہر گھر تک پہنچا دیا۔ ابتدائی وارننگ کے آدھے گھنٹے بعد ایف سولہ جنگی طیاروں نے عمارتوں کو زبردست دھماکوں اور دھول کے بادلوں میں گرا دیا۔

ضلع کے ایک رہائشی علی نے بتایا، "وہ سب کچھ جو میں نے کبھی خواب میں دیکھا تھا اور سوچا تھا کہ میں نے حاصل کر لیا ہے۔ اس اپارٹمنٹ میں میرا خواب تھا، میرے بچوں اور میری بیوی کے ساتھ میری یادیں، حفاظت اور محبت کی خوشبو تھی”۔ فون کے ذریعے رائٹرز سے بات کر نے والے علی نے انتقامی کارروائیوں کے خوف سے اپنا پورا نام بتانے سے انکار کر دیا۔

اقوام متحدہ کے انسانی امور کے دفتر نے کہا کہ 140,000 سے زیادہ مکانات – غزہ کے تمام گھروں کا تقریباً ایک تہائی – کو نقصان پہنچا ہے، تقریباً 13,000 مکمل طور پر تباہ ہو گئے ہیں۔

غزہ کا جنوب بھی تسلسل سے نشانہ بنتا رہا ہے۔ غزہ کے حکام نے بتایا کہ غزہ کے مرکزی جنوبی شہر خان یونس پر تازہ حملوں میں متعدد افراد ہلاک اور زخمی ہوئے ہیں۔

لبنان، ویسٹ بینک میں دوسرے محاذ

اسرائیلی فوج زمینی حملہ کے حکم کی توقع میں غزہ کے ارد گرد جمع ہو رہی ہے، تنازع دو دیگر محاذوں تک بھی پھیل رہا ہے – مغربی کنارے اور لبنان کے ساتھ شمالی سرحد۔

اسرائیلی وزارت دفاع نے لبنان کی سرحد کے قریب واقع اسرائیل کے سب سے بڑے قصبے کریات شمونہ کے رہائشیوں کوقصبہ خالی کرنے کا حکم دیا۔ اسرائیل اور لبنان کی حزب اللہ تحریک کے درمیان سرحد پر ہونے والی جھڑپیں 2006 میں مکمل طور پر شروع ہونے والی جنگ کے بعد سب سے زیادہ مہلک رہی ہیں۔

مغربی کنارے میں، فلسطینی وزارت صحت نے کہا کہ اسرائیلی فوجیوں کی جانب سے طولکرم کے قریب نور شمس پناہ گزین کیمپ پر ہوائی حملے میں پانچ بچوں سمیت 13 افراد ہلاک ہو گئے۔

سفارت کاروں کو خدشہ ہے کہ تنازع مزید پھیل سکتا ہے۔ پینٹاگون نے جمعرات کو کہا کہ شمالی بحیرہ احمر میں کام کرنے والے امریکی بحریہ کے ایک جنگی جہاز نے یمن میں حوثی تحریک کی طرف سے ممکنہ طور پر اسرائیل کی طرف داغے گئے تین کروز میزائلوں اور کئی ڈرونز کو روکا۔

غزہ میں حماس اور لبنان کی حزب اللہ کی طرح حوثیوں کو ایران کی حمایت حاصل ہے، جس نے اسرائیل پر حماس کے حملوں کی تعریف کی ہے حالانکہ وہ ان کے پیچھے ہونے کی تردید کرتا ہے۔

غزہ کی امداد مسلسل بند

مغربی رہنماؤں نے اب تک زیادہ تر حماس کے خلاف اسرائیل کی مہم کی حمایت کی پیشکش کی ہے، حالانکہ غزہ میں شہریوں کی حالت زار کے بارے میں بے چینی بڑھ رہی ہے، جنہیں ابھی تک طویل عرصے سے وعدہ شدہ امداد موصول نہیں ہوئی ہے۔

بائیڈن نے اپنی تقریر میں کہا کہ "ہم معصوم فلسطینیوں کی انسانیت کو نظر انداز نہیں کر سکتے جو صرف امن کے ساتھ رہنا چاہتے ہیں اور انہیں موقع ملے گا”۔

اسرائیل نے کہا ہے کہ جب تک یرغمال بنائے گئے 200 سے زائد افراد کو رہا نہیں کر دیا جاتا، وہ اپنی ہی سرزمین سے کسی قسم کی امداد کو غزہ تک پہنچنے کی اجازت نہیں دے گا۔

بائیڈن نے اسرائیل سے یہ وعدہ حاصل کیا کہ وہ مصر سے غزہ میں کچھ امداد کی اجازت دے گا، بشرطیکہ اس کی نگرانی کی جائے تاکہ یہ یقینی بنایا جا سکے کہ حماس تک کوئی مدد نہ پہنچے۔ ابھی تک، ٹرک کراسنگ کے دوسری جانب مصر کی حدود میں کھڑے ہیں۔