مہنگائی کنٹرول نہ کرنے پر لاہور ہائیکورٹ نے وفاقی اور پنجاب حکومت کو نوٹس کر دیے

لاہور ہائیکورٹ نے کھانے کی اشیاء کی قیمتوں میں اضافے کیخلاف درخواست پر وفاقی اورصوبائی حکومت کو نوٹس جاری کر دیئے اور آئندہ سماعت پر جواب داخل کرانے کی ہدایت کی ہے۔

لاہور ہائیکورٹ کے جسٹس شاہد کریم نے جوڈیشل ایکٹوازم پینل کے سربراہ اظہر صدیق ایڈووکیٹ کی درخواست پر سماعت پر سماعت کی جس میں مہنگائی کے تدراک کیلئے موثر اقدامات نہ کرنے کی نشاندہی کی گئی۔

درخواست  میں نشاندہی کی گئی کہ مرغی کے گوشت،چاول ، گھی ، چینی سمیت دیگر اشیائے  کی قیمتوں میں مسلسل اضافہ ہو رہا ہے۔

درخواست میں بتایا گیا کہ ٹماٹر،پیاز ،سبزیوں اور دالوں کی قیمتیں آسمان سے باتیں کررہی ہیں اور حکومت قمیتوں کو کنٹرول کرنے میں مکمل طور پر ناکام ہو چکی ہے۔ اسی وجہ سے ضرورت کی  اشیائے  عوام کی پہنچ سے دورہونے سے عام شہریوں کو مسائل کا سامنا ہے۔

درخواست میں نکتہ اٹھایا گیا کہ آئین کے تحت شہریوں کو بنیادی ضروریات کی اشیاء سے کسی صورت محروم نہیں کیا جا سکتا اور شہریوں کو مہنگائی سے نجات دلانا ریاست کی اولین ذمہ داری ہے۔

درخواست میں استدعا کی گئی کہ حکومت کو کھانے پینے کی اشیا کی قیمتوں میں حالیہ  اضافے کے خلاف اقدامات کرنےکاحکم دیا جائے. اس کے علاوہ  مصنوعی مہنگائی کے مرتکب افراد کے خلاف قانونی کارروائی کی جائے۔