قوم کو انتشار اور تقسیم کی سیاست سے آگے بڑھنے کے لیے شفا بخش رابطے کی ضرورت ہے، آرمی چیف

آرمی چیف جنرل سید عاصم منیر نے انتخابات کے کامیاب انعقاد پر قوم،نگران حکومت،الیکشن کمیشن،سیاسی جماعتوں اورجیتنے والے امیدواران کو مبارکباد دی ہے۔

پاک فوج کے شعبہ تعلقات عامہ ( آئی ایس پی آر) کے مطابق آرمی چیف جنرل عاصم منیر نے کہا کہ انتخابات عوام کے مینڈیٹ کا تعین کرنے کی مشق ہے،انتخابات اور جمہوریت پاکستان کے عوام کی خدمت کا ذریعہ ہیں،حق رائے دہی  کا آزادانہ استعمال جمہوریت کیلئے عزم کا ثبوت ہیں۔

آرمی چیف جنرل سید عاصم منیر نے کہا کہ الیکشن میں محفوظ ماحول کی فراہمی پر قانون نافذ کرنے والے اہلکارقابل تحسین ہیں،میڈیا،سول سوسائٹی،انتظامیہ وار عدلیہ کے ارکان نے مشق کے کامیاب انعقاد کو ممکن بنایا،جمہوری قوتوں کی نمائندہ متحدہ حکومت متنوع سیاست  اور تکثیریت کو بہترطریقےسےپیش کرےگی،انتخابات اور جمہوریت پاکستان کے عوام کی خدمت کا ذریعہ ہیں،قوم کو انتشار اور پولرائزیشن کی سیاست سے آگے بڑھنے کیلئے شفا بخش رابطے کی ضرورت ہے۔

آرمی چیف نے کہا کہ پولرائزیشن اور انتشار 250 ملین آبادی والے ترقی پسند ملک کیلئے موزوں نہیں ہے،انتخابات جیتنےاور ہارنے کا مقابلہ نہیں،عوام کے مینڈیٹ کا تعین کرنے کی مشق ہے،سیاسی قیادت کو ذاتی مفادات سےبالاترہوکرعوامی خدمت کی کوششوں کو ہم آہنگ کرناچاہئے۔