انتخابی نشان کی بحالی کے لیے تحریک انصاف کی درخواست سپریم کورٹ میں دس جنوری کو سماعت کے لیے مقرر

تحریک انصاف کی بلے کے نشان کے لئے درخواست سپریم کورٹ میں 10 جنوری کو سماعت کے لئے مقرر کرلی گئی۔

ذرائع کے مطابق چیف جسٹس قاضی فائز عیسیٰ نے وکیل حامد خان سے پوچھا، کیا آپ کی درخواست کل مقرر کردیں۔ جس پر وکیل حامد خان نے کہا، ہماری ترجیح آج ہے، نہیں تو پھر پرسوں لگا دیں۔

ذرائع کے مطابق پی ٹی آئی کے وکلاء بیرسٹر گوہر اورحامد خان نے رجسٹرار سپریم کورٹ سے ملاقات کی اور درخواست آج ہی سماعت کے لیے مقرر کرنے کی استدعا کی۔

پی ٹی آئی کے وکلا نے استدعا کی کہ یہ اہم نوعیت کا مقدمہ ہے، فوری طور پر سماعت کی جائے۔

واضح رہے کہ 3 جنوری کو پشاور ہائیکورٹ نے الیکشن کمیشن کی نظر ثانی اپیل پر محفوظ فیصلہ سناتے ہوئے الیکشن کمیشن کی درخواست منظور کرلی اور حکم امتناع واپس لے لیا۔ اور عالت نے الیکشن کمیشن کا 22 دسمبرکا فیصلہ بحال کردیا تھا۔