مسلم لیگ ن پنجاب میں تنہا حکومت سازی کے قابل، اسمبلی اجلاس 29 فروری سے پہلے بلانے کا فیصلہ

مسلم لیگ ن سب سے بڑے صوبے پنجاب میں پیپلز پارٹی سمیت دیگر جماعتوں کے تعاون کے بغیر بھی حکومت بنانے کی پوزیشن میں ہے ۔

مسلم لیگ ن کے رہنمائوں کا دعویٰ ہےکہ آزاد امیدواروں کی شمولیت سے پارٹی کی نشستوں کی تعداد 160 سے بھی تجاوز کر گئی ہے جبکہ مزید آزاد امیدواروں کی شمولیت کا سلسلہ ابھی جاری ہے۔

پنجاب اسمبلی کا اجلاس فروری کےآخری ہفتےمیں طلب کرنےکا فیصلہ کیا گیا ہے، مخصوص نشستوں کا نوٹیفکیشن ہوتے ہی پنجاب اسمبلی کا اجلاس طلب کرلیا جائے گا ۔

پنجاب اسمبلی کا اجلاس 29 فروری سے قبل طلب کیا جائے گا اس حوالے سے پنجاب اسمبلی سیکرٹریٹ نے بھی اجلاس کی تیاریاں مکمل کرلیں ہیں ۔

آئندہ 72 گھنٹوں میں اجلاس کی حتمی تاریخ کا تعین کر کے سمری بھیج دی جائےگی، پنجاب اسمبلی کے طلب کردہ اجلاس میں ارکان کا حلف،اسپیکر، ڈپٹی اسپیکر،وزیر اعلیٰ کا انتخاب ہوگا۔

واضح رہے کہ الیکشن ڈے کے بعد اکیس دن کے اندرآئینی طور پراسمبلی اجلاس طلب کرنا لازم ہے۔