چینی انجینئرز کی گاڑی بم پروف نہیں تھی، خیبر پختونخوا پولیس کی رپورٹ

خیبرپختونخوا پولیس نے شانگلہ میں داسو ڈیم کے چینی انجینئرز پرخود کش حملے کی دوسری رپورٹ وفاق کو بھیج دی۔ رپورٹ میں کہا گیا ہے کہ خود کش حملہ آور نے چینی انجینئرز کی بارہ گاڑیوں کے قافلے کو بائیں طرف سے ٹکر ماری، گاڑی بم پروف نہیں تھی۔

رپورٹ میں کہا گیاہے کہ 26 مارچ کو  خود کش حملہ آور نے داسو ڈیم کے انجینئرزکی گاڑیوں کے قافلہ کو لاہور نالہ کے قریب  ٹکر ماری۔ جس کے نتیجے میں 5 چینی انجینئرز اور ایک پاکستانی ڈرائیور موقع پردم توڑ گئے۔۔

خیبرپختونخواپولیس کی رپورٹ میں کہا گیاہے کہ حادثے کی جگہ سے خود کش حملے میں استعمال ہونےوالی گاڑی کا انجن حاصل کرلیا گیاہے۔

اس کے علاوہ خود کش حملہ آور کے اعضا، موبائل فون کور اور سم حاصل کرنے کے بعد لیبارٹری بھیج دئیے گئے ہیں۔

رپورٹ میں کہا گیا ہے کہ چینی انجینئرز کا قافلہ 12گاڑیوں پر مشتمل  تھا۔ہر گاڑی کے درمیان 10سے 15 فٹ تک کا فاصلہ تھا۔

تمام گاڑیوں میں کلوز سرکٹ کیمرے نصب تھے۔ بم پروف نہ ہونے کی وجہ سے خودکش حملے کے نتیجے میں چینی انجینئرز کی گاڑی 300فٹ گہر ی  کھائی میں گرگئی۔