نیب جس طریقے سے چل رہا ہے، کیا عمران خان اس سے متفق ہیں؟ جسٹس جمال مندوخیل، نیب نے آج تک بنیادی حقوق کی خلاف ورزی کی ہے، جسٹس اطہر من اللہ

سپریم کورٹ میں نیب ترامیم کیس کی سماعت کے دوران جسٹس اطہر من اللہ نے ریمارکس دیئے نیب کے وجود نے 1999 سے آج تک بنیادی حقوق کی خلاف ورزی کی ہے۔ جسٹس جمال مندوخیل استفسار کیا کہ کیا نیب جس طریقے سے چل رہا ہے، عمران خان اس سے متفق ہیں؟

چیف جسٹس قاضی فائز عیسیٰ نے ریمارکس دیے کہ منتخب عوامی نمائندوں کے پاس فنڈز خرچ کرنے کا اختیار نہیں تھا،ایم پی اے ، ایم این اے، کا فنڈ کس نے شروع کیا ؟

چیف جسٹس نے عمران خان کا نام لیے بغیر کہا کہ لوگوں کو توڑنے کا اس وقت طریقہ بھی یہی تھا، نیب یا ایم این ایز کا فنڈ۔

جسٹس جمال مندوخیل نے ریمارکس دیے کہ قانون بنا دیں غیر قانونی سمری تیار کرنے والا ذمہ دار ہوگا ،دیکھتا ہوں کرپشن کیسے ہوتی ہے ؟کرپشن مسئلہ ہے مگر مسئلے اور بھی بہت پڑے ہیں۔

خواجہ حارث نے کہا کہ بین الاقوامی کنونشن موجود ہے کہ ہر ملک احتساب کا قانون رکھے گا۔ چیف جسٹس قاضی فائز عیسیٰ نے کہا کہ پاکستان ان قوانین پر عمل کرکے گرے لسٹ سے باہر آیا۔