جب تک الیکشن نہیں ہوتے حکومت ہماری چلے گی، نگران وزیراعلیٰ پنجاب

پنجاب کے نگران وزیراعلیٰ نے کہا ہے کہ جب تک الیکشن نہیں ہوتے ہماری حکومت چلے گی، ہمارے گھروں میں بات ہوتی ہے کہ ملک ترقی نہیں کررہا، مایوس نہیں ہونا چاہیے، مایوسی گناہ ہے۔

سروسز ہسپتال میں  سینئر ڈاکٹرز سے خطاب کرتے ہوئے نگران وزیراعلیٰ پنجاب نے کہا کہ چند دن قبل  سروسز اسپتال آیا تھا،سروسز اسپتال کی صورتحال انتہائی خراب دیکھ کر دکھ ہوا،صورتحال دیکھ کر کہا کسی دشمن کو بھی اس اسپتال میں نہ بھیجوں۔

محسن نقوی نے مزید کہا کہ چھوٹی چھوٹی کوشش سے چیزیں تبدیل ہوجائیں گی،تمام شہریوں کو معاشرے میں بہتری کیلئے کردار ادا کرنا ہوگا،حکومت کے ساتھ ساتھ عملے اور شہریوں کو ذمہ داریاں نبھانا ہوں گی۔

نگران وزیراعلیٰ نے کہا کہ سرکاری اسپتالوں میں مریضوں کی تعداد  بہت زیادہ ہے،حکومت محدود وسائل کے باوجود سرکاری اسپتالوں میں سہولیات فراہم کررہی ہے،ہر حکمران نیا اسپتال بناتا ہے پرانے کو بہتر کرنے کی کوشش نہیں کی جاتی۔

انہوں نے کہا کہ ہر خرابی کا ذمہ دار ڈاکٹرز کو ٹھہرانا درست نہیں ہے،ڈاکٹرز شام میں کام ضرورکریں مگر ڈیوٹی پوری کریں۔