آج ہیموفولیا کا عالمی دن، پاکستان میں 20 ہزار سے زیادہ بچے بیماری کا شکار

پاکستان میں 20 ہزار سے زائد بچے خون سے متعلق بیماری ہیموفیلیا کا شکار ہیں۔

آج ہیموفیلیا سے متعلق عالمی دن کے موقع پر ماہرین امراض خون کا کہنا ہے کہ مرض سے بچاؤ خاندان میں شادیوں سے گریز اور دوران حمل دس سے چودہ ہفتوں کے درمیان جینیٹک ٹیسٹنگ سے ہی ممکن ہے۔

ماہرین کا کہنا ہے کہ ہیموفیلیا موروثی مرض ہے، جس میں جسم میں خون جمنے کی صلاحیت ختم ہوجاتی ہے، جسم میں کہیں بھی چوٹ لگنے، دانت ٹوٹنے یا خون کے کسی بھی وجہ سے رساؤ کی صورت میں خون بہنا بند نہیں ہوتا۔

ماہرین امراض خون کے مطابق جسم میں پیدائشی طور پر فیکٹر نائن پروٹین کی عدم موجودگی اس مہلک مرض کا باعث بنتی ہے، ہیموفیلیا سے متاثرہ مریضوں کو پابندی سے فیکٹر نائن انجیکشنز یا اسکا متبادل پلازمہ لگتا رہے تو مریض نارمل زندگی بسر کرسکتا ہے۔

پاکستان میں یہ انجیکشنز مہنگے ہونے کے باعث عام آدمی کی دسترس سے باہر ہیں اور بیشتر مریضوں کو خون کے امراض سے متعلق رفاحی اداروں کی جانب دیکھنا پڑتا ہے۔