عثمان بزدار نیب کے 14 بار بلانے کے باوجود پیش نہ ہوئے، گرفتاری کا فیصلہ

قومی احتساب بیورو ( نیب) نے طلبی کے باوجود عدم پیشی پر سابق وزیراعلیٰ پنجاب عثمان بزدار کو گرفتار کرنے کا فیصلہ کیا ہے۔

ذرائع کے مطابق نیب لاہور نےعثمان بزدار کی گرفتاری کے چیئرمین نیب سے وارنٹ گرفتاری جاری کرنے کی استدعا کی ہے،نئے آرڈیننس کے تحت عثمان بزدار کو دوران انکوائری بھی گرفتار کیا جا سکتاہے۔

ذرائع کا کہنا ہے کہ عثمان بزدار پر نئے آرڈیننس کا اطلاق کرنے کا فیصلہ کیا گیا ہے کیونکہ عثمان بزدار طلبی کے باوجود 14ویں بار آج نیب لاہور پیش نہیں ہوئے۔

عثمان بزدار کے وکیل نے نیب سے استدعا کی تھی کہ وہ بیماری کی وجہ سے نیب لاہور میں پیش نہیں ہو سکتے، نیب نے عثمان بزدار کے وکیل کی استدعا مسترد کردی۔

عثمان بزدار کیخلاف آمدن سے زائد اثاثہ جات، تقرر و تبادلے،  ٹھیکوں میں بے ضابطگی کا کیس چل رہا ہے، عثمان بزدار سمیت خاندان پر 9 ارب سے زائد اثاثہ جات بنانے کا کیس زیر تفتیش ہے۔