چین کی معاشی مشکلات سے دنیا خوفزدہ کیوں؟ دنیا کے معاشی انجن کے ساتھ خرابی کیا ہوئی؟

چین طویل عرصے سے عالمی ترقی کا انجن رہا ہے۔لیکن حالیہ ہفتوں میں، اس کی معاشی سست روی نے بین الاقوامی رہنماؤں اور سرمایہ کاروں کو خوف زدہ کر دیا ہے۔ درحقیقت، دہائیوں میں پہلی بار، دنیا کی دوسری معیشت خود ہی مسئلہ بن گئی ہے۔

جمعہ کے روز ہانگ کانگ کا ہینگ سینگ انڈیکس 20 فیصد گر گیا، چینی یوآن 16 سال کی کم ترین سطح پر آگیا اور چین کے مرکزی بینک کو اپنی کرنسی کو سنبھالا دینے کے لیے آن ریکارڈ آگے آنا پڑا، مرکزی بینک نے مارکیٹ قیمت کی نسبت کرنسی کی شرح تبادلہ زیادہ مقرر کی۔

مسئلہ یہ ہے کہ اس سال کے شروع میں کووِڈ لاک ڈاؤن کے خاتمے کے بعد تیزی سے سرگرمیاں بڑھنے کے بعد ترقی رک رہی ہے۔ قیمتیں گر رہی ہیں، رئیل اسٹیٹ کا بحران گہرا ہو رہا ہے اور برآمدات زوال پذیر ہیں۔ نوجوانوں میں بے روزگاری اتنی بڑھ گئی ہے کہ حکومت نے ڈیٹا شائع کرنا بند کر دیا ہے۔

حالات مزید گھبیر تب دکھائی دیئے جب چین کی دوسری بڑی ریئل سٹیٹ کمپنی اور سرمایہ کار کمپنی ایور گرینڈ نے حالیہ ہفتوں میں اپنے سرمایہ کاروں کو ادائیگی نہیں کی جس سے خدشہ پیدا ہوا ہے کہ چین کی ہاؤسنگ مارکیٹ مالی استحکام کے لیے خطرہ بن سکتی ہے۔

کئی بڑے بینک چین کی شرح ترقی کے تخمینے کم کر رہے ہیں اور ان کی پیشگوئی ہے کہ چین کی شرح ترقی 5 فیصد سے کم رہے گی۔اس کا مطلب ہے کہ چین “تقریباً 5.5%” کے اپنے سرکاری نمو کے ہدف کو پانے میں ناکام ہو سکتا ہے۔

یہ 2008 کے عالمی مالیاتی بحران سے بڑا بحران ہے،2008 میں چین نے دنیا کا سب سے بڑا پیکج شروع کیا تھا اور بحران سے نکلنے والی پہلی بڑی معیشت تھی۔ یہ وبائی امراض کے ابتدائی دنوں کے بھی برعکس ہے، جب چین کساد بازاری کو چکما دینے والی واحد بڑی ترقی یافتہ معیشت تھی۔ تو کیا غلط ہوا؟

چین کی معیشت اپریل سے ہی بدحالی کا شکار ہے، جب معاشی سرگرمی کی رفتار مدھم ہوگئی۔ لیکن اس مہینے کنٹری گارڈن، جو کہ پراپرٹی کی فروخت کے لحاظ سے ملک کا سب سے بڑا ڈویلپر ہے، اور ژونگرونگ ٹرسٹ، جو ایک اعلیٰ ٹرسٹ کمپنی ہے، کے ڈیفالٹ کے بعد خدشات مزید بڑھ گئے ہیں۔

کنٹری گارڈن کی جانب سے دو امریکی ڈالر بانڈز پر سود کی ادائیگی نہ ہونے کی رپورٹوں نے سرمایہ کاروں کو خوفزدہ کر دیا اور ایور گرانڈ کی یادیں تازہ کر دیں، جس کے 2021 میں ڈیفالٹس نے رئیل اسٹیٹ بحران کے آغاز کا اشارہ دیا۔

جب کہ Evergrande اب بھی قرضوں کی تنظیم نو سے گزر رہا ہے، کنٹری گارڈن میں پریشانیوں نے چینی معیشت کے بارے میں تازہ تشویش پیدا کی۔

بیجنگ نے رئیل اسٹیٹ مارکیٹ کو بحال کرنے کے لیے معاون اقدامات کئے ہیں۔ لیکن مضبوط کھلاڑی بھی اب ڈیفالٹ کے دہانے پر ہیں، جو بیجنگ کو بحران پر قابو پانے کے لیے درپیش چیلنجوں کی نشاندہی کر رہے ہیں۔

پراپرٹی ڈویلپرز کے ڈیفالٹ ملک کی $2.9 ٹریلین انویسٹمنٹ ٹرسٹ انڈسٹری میں پھیلتے دکھائی دیتے ہیں۔ ژونگرونگ ٹرسٹ، جو کارپوریٹ کلائنٹس اور دولت مند افراد کے لیے 87 بلین ڈالر مالیت کے فنڈز کا منتظم ہے کم از کم چار کمپنیوں کو سرمایہ کاری پر ادائیگی کرنے میں ناکام رہا ہے، جس کی مالیت تقریباً 19 ملین ڈالر ہے۔ مظاہرین نے حال ہی میں ٹرسٹ کمپنی کے دفتر کے باہر بھی احتجاج کیا اور ادائیگی کا مطالبہ کیا۔

کیپٹل اکنامکس میں چائنا اکنامکس کے سربراہ جولین ایونز-پرچرڈ نے کہا، “پراپرٹی سیکٹر میں مزید نقصانات وسیع تر مالی عدم استحکام میں پھیلنے کا خطرہ ہیں،اندرونی سرمایہ کار سرکاری بانڈز اور بینک ڈیپازٹس کا رخ کر رہے ہیں جس سے مالیاتی اداروں کو لیکویڈیٹی کے مسائل کا سامنا کرنا پڑسکتا ہے۔

مقامی حکومتوں کا قرض

ایک اور بڑی تشویش مقامی حکومتوں کا قرض ہے، جو کہ جائیداد کی فروخت سے ہونے والی آمدنی میں تیزی سے کمی کے ساتھ ساتھ وبائی لاک ڈاؤن کے نفاذ کی لاگت کے دیرپا اثرات کی وجہ سے بڑھ گیا ہے۔

مقامی سطحوں پر دیکھا جانے والا شدید مالی دباؤ نہ صرف چینی بینکوں کے لیے بڑے خطرات کا باعث بنتا ہے بلکہ حکومت کی ترقی اور عوامی خدمات کو وسعت دینے کی صلاحیت کو بھی نچوڑ دیتا ہے۔

بیجنگ نے اب تک معیشت کو فروغ دینے کے لیے شرح سود میں کمی اور پراپرٹی مارکیٹ اورکاروبار کی مدد کے لیے دیگر اقدامات کی ایک سیریز متعراف کرائی ہے۔

لیکن اس نے کوئی بڑا اقدام کرنے سے گریز کیا ہے۔ اقتصادی ماہرین اور تجزیہ کاروں کا کہنا ہے کہ اس کی وجہ یہ ہے کہ عالمی مالیاتی بحران کے دوران اس قدر مقروض ہو چکا ہے کہ معیشت کو آگے بڑھانے کے لیے اب وہ 15 سال پہلے کی طرح کے اقدامات کی سکت نہیں رکھتا، اس وقت، چینی رہنماؤں نے عالمی مالیاتی بحران کے اثرات کو کم کرنے کے لیے چار ٹریلین یوآن ($586 بلین) کا مالیاتی پیکج تیار کیا تھا۔

ماہرین کہتے ہیں کہ پالیسی ساز اس بات پر فکر مند نظر آتے ہیں کہ ان کی روایتی پالیسی پلے بک قرضوں کی سطح میں مزید اضافے کا باعث بنے گی جو مستقبل میں ان پر دوبارہ اثر ڈالے گی

اتوار کے روز، بیجنگ کے پالیسی سازوں نے اس بات کی تصدیق کی کہ ان کی اولین ترجیحات میں سے ایک مقامی حکومتوں پر قرضوں کے خطرات پر قابو پانا ہے۔

مرکزی بینک کے ایک بیان کے مطابق، پیپلز بینک آف چائنا، مالیاتی ریگولیٹر اور سیکیورٹیز ریگولیٹر نے مشترکہ طور پر اس چیلنج سے نمٹنے کے لیے مل کر کام کرنے کا عہد کیا۔

آبادی کی کمی

مزید یہ کہ چین کو کچھ طویل مدتی چیلنجوں کا سامنا ہے، جیسے کہ آبادی کا بحران، اور امریکہ اور یورپ جیسے اہم تجارتی شراکت داروں کے ساتھ کشیدہ تعلقات۔

ملک کی کل زرخیزی کی شرح، ایک عورت کی زندگی بھر میں پیدا ہونے والے بچوں کی اوسط تعداد، گزشتہ سال 1.09 کی ریکارڈ کم ترین سطح پر آگئی جو صرف دو سال پہلے 1.30 تھی۔ اس کا مطلب ہے کہ چین کی زرخیزی کی شرح اب جاپان سے بھی کم ہے، ایک ایسا ملک جو طویل عرصے سے عمر رسیدہ معاشرے کے لیے جانا جاتا ہے۔

اس سال کے شروع میں، چین نے اعداد و شمار جاری کیے جس سے ظاہر ہوتا ہے کہ اس کی آبادی چھ دہائیوں میں پہلی بار پچھلے سال سکڑنا شروع ہوئی۔

موڈیز انویسٹرس سروس کے تجزیہ کاروں نے گزشتہ ہفتے ایک تحقیقی رپورٹ میں کہا کہ “چین کی عمر رسیدہ آبادی اس کی اقتصادی ترقی کی صلاحیت کے لیے اہم چیلنجز پیش کرتی ہے۔”

افرادی قوت کی کمی اور صحت کی دیکھ بھال اور سماجی اخراجات میں اضافہ وسیع مالیاتی خسارے اور قرضوں کے زیادہ بوجھ کا باعث بن سکتا ہے۔ کم افرادی قوت بھی ملکی بچت کو ختم کر سکتی ہے، جس کے نتیجے میں شرح سود میں اضافہ اور سرمایہ کاری میں کمی واقع ہوتی ہے۔

ماہرین کہتے ہیں کہ بڑی تصویر یہ ہے کہ وبائی بیماری کے آغاز کے بعد سے رجحان کی نمو کافی حد تک گر گئی ہے اور درمیانی مدت میں مزید گرنے کے لئے تیار نظر آتی ہے۔