جواز بنتا ہوا تو عمران خان کو ضرور گرفتار کریں گے، رعایت نہیں ہوگی، رانا ثناء اللہ

وفاقی وزیرداخلہ رانا ثناء اللہ نے کہا ہے کہ اگر جواز بنتا ہوا تو عمران خان کو ضرور گرفتار کیا جائے گا۔حکومت کی طرف سے ان کو کوئی رعایت نہیں دی جائیگی،جو کچھ ہوا عمران خان کی ایما پر ہوا،جوحرکتیں انہوں نے کی ہیں اس سے ان کا چہرہ سامنے آگیا ہے۔

رانا ثناء اللہ نے عمران خان کی ضمانتیں منظور ہونے کے فیصلوں کے بعد ردعمل میں کہا کہ اسلام آباد پولیس اور رینجرز عدالت میں موجود ہیں،سہولت کاری کے طریقے ایجاد ہورہے ہیں،عدالت کے فیصلے ہوتے ہوئے ہم عمران کے خلاف کارروائی کرینگے،قانون کے مطابق ہم ان کے خلاف کارروائی کریں گے۔

رانا ثناء اللہ نے کہا کہ اس طرح کےعدالتی فیصلوں کی مثال نہیں ملتی،جو حرکتیں انہوں نے کی ہیں اس سے ان کا چہرہ سامنے آ گیاہے،فیصل آباد سے جو لوگ میرے گھر آئے مجھے ان کا گھر معلوم نہیں۔