پنجاب کابینہ نے عمران خان کے ریاست مخالف بیانیہ پر قانونی کارروائی کی منظوری دے دی

بانی پی ٹی آئی عمران خان  کے ریاست مخالف بیانیے پر پنجاب حکومت نے کارروائی کی منظوری دے دی، کابینہ اجلاس کی اندرونی کہانی سامنے آ گئی ۔ بریفنگ میں کہا گیا ہے بانی پی ٹی آئی پاکستان کوتوڑنےکی منظم سازش کررہے ہیں، ، بانی پی ٹی آئی، پی ٹی آئی ورکرز سیاسی مقاصد کے لیے ریاست مخالف کام کررہے ہیں، بانی پی ٹی آئی موجودہ صورتحال کومشرقی پاکستان اور 1971 کی سیاسی صورتحال سےتشبیہ دےرہےہیں۔

کابینہ کو دی گئی بریفنگ کے مطابق پی ٹی آئی لیڈر منظم سازش کے ذریعے موجودہ صورتحال کو 1971 کا ریفرنس دے رہے ہیں،بانی پی ٹی آئی نے پارٹی رہنماوں کو پاکستان مخالف بیانیے کا ٹاسک سونپا۔

بریفنگ میں کہا گیا کہ چیئرمین پی ٹی آئی بیرسٹر گوہر علی خان نے بھی اڈیالہ جیل کے باہر ریاست مخالف بیان دیئے،گوہر علی خان نے بانی پی ٹی آئی سے مشاورت کے بعد مشرقی پاکستان کی بات دہرائی، بانی پی ٹی آئی اور دیگر ارکان کا عمل بغاوت کے زمرے میں آتاہے۔

بریفنگ میں کہا گیا کہ بانی پی ٹی آئی کےبیانات سے عوام میں منفی پروپیگنڈہ پیدا ہوا ہے،بانی پی ٹی آئی، پی ٹی آئی لیڈر نے پاکستان پینل کوڈ کے سیکشنز کی خلاف ورزی کی۔

کابینہ اجلاس کو دی گئی بریفنگ میں پاکستان پینل کوڈ کے سیکشن 121،121اے ،123اے، 131،153 کی دفعات کے تحت کارروائی کی سفارش کی گئی،بانی پی ٹی آئی کےجرم میں ملوث ہونے کی بریفنگ پرکابینہ نے کارروائی کی منظوری دی۔

پنجاب کابینہ نےکریمینل پروسیڈنگ کوڈ 1898 کے سیکشن196 کےتحت بانی پی ٹی آئی و پارٹی لیڈرزکے خلاف کارروائی کی منظوری دے دی، ایڈیشنل کمشنر کوآرڈینیشن کمشنر آفس راولپنڈی کو کریمینل کمپلینٹ فائل کرنے کا اختیار سونپ دیا۔