کراچی میں 300 سے زائد سٹریٹ کرائمز میں ملوث 3 رکنی افغان گینگ گرفتار

کراچی میں 300 سے زائد اسٹریٹ کرائمز کی وارداتوں میں ملوث تین رکنی افغان گینگ گرفتار کر لیا گیا، سندھ رینجرز اور پولیس نے سہراب گوٹھ جنت گل ٹاؤن میں مشترکہ کارروائی کی۔

ترجمان سندھ رینجرز کے مطابق افغانی ڈکیت گروہ کے انتہائی مطلوب 3 ملزمان جان آغا، امید گل عرف لغمانی اور عبدالرحمان کو گرفتار کیا گیا، ملزمان کے قبضے سے ڈکیتیوں میں استعمال ہونے والا غیر قانونی اسلحہ برآمد کر لیا گیا، گرفتار ملزمان شہر کے مختلف علاقوں میں 300 سے زائد اسٹریٹ کرائم کی کاروائیوں میں ملوث ہیں۔

گرفتار ملزمان نے مختلف وارداتوں کے دوران 3 شہریوں کو فائرنگ کرکے زخمی کرنے کا اعتراف بھی کیا، تفتیش کے دوران گرفتار ملزم جان آغانے ڈکیتیوں کے لیے کئی بار درہ آدم خیل سے بذریعہ سوشل میڈیا اسلحہ منگوانے کا انکشاف بھی کیا۔

ترجمان کے مطابق گرفتار ملزم جان آغاایک منظم گروہ کے سرغنہ کے طور پر اپنے گروپ کو آپریٹ کرتا تھا، ملزم کئی بار گرفتاری کے ڈر سے ایران میں روپو شی کے لیے چلا جاتا تھا اور کچھ عرصے بعد کراچی واپس آکر دوبارہ جرائم میں ملوث ہو جاتا تھا۔

ملزمان نے شہر یوں سے چھینے گئے موبائل فروخت کے لیے افغانستان بھیجے جانے کا بھی انکشاف کیا ہے،گرفتار ملزمان اس سے پہلے بھی ڈکیتی کی متعدد وارداتوں میں گرفتار ہو کر جیل بھی جاچکے ہیں