افریقی ملک سے کراچی آنے والی خاتون کے پیٹ سے کوکین بھرے 86 کیپسول برآمد

اینٹی نارکوٹکس فورس نے جناح انٹرنیشنل ائیرپورٹ کراچی پر کارروائی کے دوران برونڈی(افریقہ)سے پہنچنے والی غیر ملکی خاتون کے پیٹ سے 86 کوکین بھرے کیپسول برآمد کرلیے۔

ترجمان اے این ایف کے مطابق منشیات اسمگلنگ کے خلاف کریک ڈاؤن جاری ہے،5کارروائیوں میں 118 کلوگرام سے زائد منشیات برآمد، 4 ملزمان کو گرفتار کرلیا گیا،جناح انٹرنیشنل ائیرپورٹ کراچی پر غیر ملکی خاتون کے پیٹ سے 86 کوکین بھرے کیپسول برآمد کیے گئے،برآمدہ کیپسولوں سے ایک کلو  گرام کوکین برآمد کر لی گئی، مذکورہ خاتون مشرقی افریقہ کے ملک برونڈی سے پرواز نمبر WY-323 کے ذریعے کراچی پہنچی تھی۔

شکار پور سکھر کے قریب قمبر شہداد کوٹ کے رہائشی ملزم سے 7 کلو چرس تحویل میں لی گئی،گوادر کے غیر آباد علاقے میں اسمگلنگ کے لئے چھپائی گئی 65 کلو چرس قبضے میں لی گئی۔

واپڈا ٹاؤن لاہور کے قریب کارروائی کے دوران نجی کوریئر کمپنی کا مالک گرفتار ہوا،ملزم کی گاڑی میں موجود پارسل سے 3 کلو 612 گرام آئس برآمد کی گئیآئس مہارت کے ساتھ پی آر سی پائپس کی فٹنگ میں چھپائی گئی تھی،ملزم نے بیرون ملک منشیات اسمگلنگ کیلئے اسمگلروں کو سہولیات فراہم کرنے کا اعتراف کرلیا۔

رنگ روڈ پشاور پر گاڑی کے خفیہ خانوں سے 24 کلو چرس اور 18 کلو افیون قبضے میں لی گئی،نارووال کا رہائشی ملزم منشیات پنجاب اسمگل کرنے کی کوشش میں گرفتار ہوا،ملزمان کے خلاف انسدادِمنشیات ایکٹ کے تحت مقدمات درج کر کے مذید تحقیقات کا آغاز کر دیا گیا ہے۔