نادرا سے 27 لاکھ شہریوں کا ڈیٹا چوری ہونے کی تصدیق، رپورٹ وزارت داخلہ میں جمع کرادی گئی

نادرا سے شہریوں کا ڈیٹا چوری ہونے کے بڑے اسکینڈل کی تحقیقات مکمل کر لی گئیں، ذرائع کے مطابق جے آئی ٹی نے 27 لاکھ پاکستانیوں کا ڈیٹا چوری ہونے کی تصدیق کردی۔

ذرائع کا کہنا ہے کہ جے آئی ٹی نےتحقیقاتی رپورٹ مکمل کر لی اور یہ رپورٹ وزارت داخلہ میں جمع کروائی گئی ہے،نادرا سے شہریوں کا ڈیٹا 2019 سے 2023 کے دوران چوری کیا گیا۔

ذرائع کا کہنا ہے کہ ڈیٹا لیک اسکینڈل میں ملتان، پشاور اور کراچی کے نادرا دفاتر ملوث پائے گئے، رپورٹ میں نادرا کے متعدد اعلیٰ افسران کے خلاف کاروائی کی سفارش کی گئی ہے۔

ذرائع کے مطابق نادرا کا ڈیٹا ملتان سے پشاوراور پھر دبئی گیا،  نادرا ڈیٹا ارجنٹائن اور رومانیہ میں فروخت ہونے کے شواہد بھی ملے۔

مشترکہ تحقیقاتی ٹیم کی سربراہی ایف آئی اے کے وقارالدین سید نے کی ،جے آئی ٹی میں حساس اداروں سمیت نادرا کے نامزد افسران بھی شامل تھے۔