نیویارک میں ٹیلر سوئفٹ کے گھر کے قریب سے چند دنوں کے اندر ایک شخص دو بار گرفتار

پولیس اور مقامی میڈیا نے منگل کو رپورٹ کیا کہ سیئٹل کے ایک شخص کو نیویارک شہر میں موسیقار ٹیلر سوئفٹ کے گھر کے باہر چند دنوں کے دوران دو بار گرفتار کیا گیا، دوسری بار تعاقب اور ہراساں کرنے کے الزام میں۔

نیویارک پولیس ڈیپارٹمنٹ نے کہا کہ اسے ہفتے کے روز ایک 911 کال ملی کہ 33 سالہ ڈیوڈ کرو ٹریبیکا کے مین ہٹن محلے کی ایک سڑک پر ایک عمارت کا دروازہ کھولنے کی کوشش کر رہا تھا جہاں 34 سالہ سوئفٹ کا اپارٹمنٹ ہے۔ اے بی سی نیوز نے رپورٹ کیا کہ وہ سوئفٹ کے گھر کا دروازہ کھولنے کی کوشش کر رہا تھا اور سوئفٹ کی سکیورٹی ٹیم کے ایک رکن نے پولیس کو اطلاع دی۔

پولیس نے بتایا کہ اسے 2017 کے آؤٹ سٹینڈنگ وارنٹ پر گرفتار کیا گیا۔

پولیس نے پیر کی شام دوبارہ ڈیوڈ کرو کو عمارت کے قریب سے یہ اطلاعات موصول ہونے کے بعد گرفتار کیا کہ وہ گلی میں ایک سے زیادہ لوگوں کو ہراساں کر رہا ہے اور “ہنگامہ” کر رہا ہے۔

 نیویارک پوسٹ نے رپورٹ کیا کہ اس نے عمارت میں داخل ہونے کی کوشش نہیں کی، لیکن لوگوں سے پوچھ رہا تھا کہ کیا وہ جانتے ہیں کہ سوئفٹ وہاں رہتی ہے۔

پولیس نے بتایا کہ اسے دوبارہ گرفتار کیا گیا، اس بار تعاقب اور ہراساں کرنے کے متعدد الزامات میں، اور منگل کو پولیس کی حراست میں رہا۔

سوئفٹ، جو نیشوِل کے کنٹری میوزک سین سے نکل کر امریکا کے سب سے کامیاب فنکاروں میں سے ایک بن گئی ہے، کو کئی سالوں کے دوران اسٹاکرز نے بار بار ہراساں کیا ہے۔ سوئفٹ کے ترجمان نے منگل کو فوری طور پر سوالات کا جواب نہیں دیا۔