امریکا نے پاکستان کو دوطرفہ اقتصادی مذاکرات کی دعوت دے دی

امریکہ نے پاکستان کو دو طرفہ اعلیٰ سطح کے اقتصادی مذاکرات کی دعوت دے دی ہے۔

بزنس ریکارڈر کی رپورٹ کے مطابق یہ مذاکرات 29 اپریل سے تین مئی کے دوران واشنگٹن میں ہوں گے جن کے دوران پاکستان اور امریکہ کے درمیان اقتصادی تعلقات کو مضبوط بنانے پر بات چیت کی جائے گی۔

دفتر خارجہ نے بتایا کہ مذاکرات کی دعوت اسلام آباد میں امریکی سفارت خانے کی جانب سے پاکستان کو دی گئی ہے۔ امریکہ کے انڈر سیکرٹری برائے اقتصادی ترقی خوزے فرنانڈز مذاکرات میں امریکی ٹیم کی قیادت کریں گے۔

بات چیت کے دوران پاک ایران گیس پائپ لائن کا معاملہ بھی امریکہ کی جانب سے اٹھایا جائے گا اور واشنگٹن پاکستان کو توانائی کے دیگر ذرائع پر مدد کی پیشکش کرے گا۔

بات چیت کا مقصد معیشت، توانائی اور ماحولیات پر تعاون کے راستے تلاش کرنا ہے۔

اعلی سطح کے ان مذاکرات کے تحت پاکستان اور امریکہ میں تین ڈائیلاگز ہوں گے جن میں سے دو انرجی سیکورٹی اور کلائنٹ اینڈ انوائرمنٹ ورکنگ گروپ پہلے ہی چل رہے ہیں۔ جبکہ تیسرا ڈائیلاگ معیشت پر شروع کیا جائے گا۔

مذاکرات کی دعوت ایک ایسے موقع پر آئی ہے جب ایرانی صدر پاکستان کا دورہ کرنے والے ہیں اور پاکستان نے پاک ایران گیس پائپ لائن پر کام دوبارہ شروع کرنے کا عندیہ دیا ہے۔