الیکشن سے پہلے ترقیاتی منصوبوں کے لیے ارکان پارلیمنٹ کو 61 ارب روپے کے فنڈز جاری کرنے کی منظوری

اسمبلیوں اور حکومت مدت پوری ہوتے ہی ترقیاتی فنڈز کی تقسیم کا عمل تیز کردیا گیا، ذرائع کا کہنا ہے کہ رواں مالی سال کے بجٹ میں 90 ارب روپے وفاقی بجٹ میں مختص کئے گئے تھے جن میں 41 ارب روپے اس سال حکومت کی مدت پوری ہونے سے پہلے خرچ کرنے کی منصوبہ بندی کر لی گئی ہے۔

پلاننگ کمیشن کے ذرائع کا کہنا ہے کہ حکومت کی مدت ختم ہونے سے پہلے ارکان پارلیمنٹ کی ترقیاتی سکیموں کے لیے 61 ارب روپے جاری کئے جا رہے ہیں، اس رقم میں 20 ارب روپے پچھلے مالی سال کے اور 41 ارب روپے موجودہ مالی سال کے بجٹ سے جاری کئے جا رہے ہیں۔

ذرائع کا کہنا ہے کہ ایم این ایز کی ترقیاتی سکیموں کے لیے فنڈز کا قسطوں میں اجرا کیا جا رہا ہے، ایم این ایز کو سپیشل ڈویلپمنٹ گرانٹس کے نام پر فنڈز دئیے جا رہے  ہیں،اگلے الیکشن میں ترقیاتی کاموں کی بنیاد پر ووٹ بٹورے جائیں گے۔

ذرائع کا کہنا ہے کہ وزارت خزانہ نے ارکان پارلیمنٹ کی سکیموں کے فنڈز کے اجرا کی منظوری گزشتہ ہفتے دی، وزارت خزانہ کے پچھلے ہفتے کے میمورنڈم کی بنیاد پر فنڈز جاری کرنے کا عمل شروع ہو چکا ہے۔