بہاولپور یونیورسٹی سکینڈل، وزیراعلیٰ پنجاب نے جوڈیشل تحقیقات کا اعلان کردیا

نگران وزیراعلیٰ پنجاب محسن نقوی نے اسلام آباد سے واپسی پر گزشتہ رات ائر پورٹ پر اہم اجلاس کی صدارت کی،جس میں اسلامیہ یونیورسٹی بہاولپور میں پیش آنے والے واقعہ کی ابتدائی رپورٹ پیش کی گئی۔

وزیراعلیٰ محسن نقوی نے تحقیقاتی کمیٹی کی رپورٹ کی روشنی میں واقعہ پر جوڈیشل کمیشن کے قیام کا اعلان کیااورکہا کہ اس ضمن میں چیف جسٹس لاہور ہائی کورٹ کو جوڈیشل کمیشن کے قیام کے لئے باقاعدہ درخواست کی جائے گی۔کیس کی تفتیش بہاولپور سے لاہور شفٹ کر دی گئی ہے۔

اجلاس میں فیصلہ کیاگیا کہ اسلامیہ یونیورسٹی بہاولپور سمیت تمام یونیورسٹیوں میں انسداد ہراسمنٹ سیل بنائے جائیں گے اور خواتین پروفیسرز ان سیل کی سربراہ ہوں گی جبکہ صوبائی سطح پر بھی خصوصی انسداد ہراسمنٹ سیل قائم کیا جائے گا،جسے خاتون سیکرٹری ہیڈ کریں گی۔

محسن نقوی نے کہاکہ یہ ہماری بچیوں کا معاملہ ہے، اس کی جامع تحقیقات کرکے حقائق سامنے لائیں گے۔ بیٹیاں سب کی سانجھی ہوتی ہیں،کسی کی عزت پر حرف نہیں آنے دیں گے۔

تین رکنی تحقیقاتی کمیٹی کے کنوینر ڈی آئی جی سپیشل برانچ فیصل علی راجہ نے اجلاس میں تحقیقاتی رپورٹ پیش کی۔

صوبائی وزیر ہائیر ایجوکیشن منصور قادر، چیف سیکرٹری، انسپکٹر جنرل پولیس، ایڈیشنل آئی جی سپیشل برانچ، سیکرٹری قانون، ایڈیشنل چیف سیکرٹری داخلہ،سپیشل سیکرٹری ہائیر ایجوکیشن، تحقیقاتی کمیٹی کے کنوینر ڈی آئی جی سپیشل برانچ فیصل علی راجہ، ڈی آئی جی انٹرنل اکاؤنٹی بلٹی برانچ سید محمد امین بخاری،ڈائریکٹر ایف آئی اے اور متعلقہ حکام نے اجلاس میں شرکت کی۔

تحقیقاتی کمیٹی کے کو کنوینر سیکرٹری مائنز بابر امان بابر ویڈیو لنک کے ذریعے اجلاس میں شریک ہوئے۔