پنجاب میں مفید مادہ جانور کے ذبیحہ پر پابندی، لائیو سٹاک پیداوار میں اضافے کے لیے ایمرجنسی کے نفاذ کا فیصلہ

وزیراعلیٰ پنجاب محسن نقوی کی ہدایت پر لائیوسٹاک سیکٹر کی پیداوار بڑھانے کے لئے مفید مادہ جانور کو ذبح کرنے پرپابندی عائد کردی گئی۔پابندی کااطلاق پنجاب کے تمام ا ضلاع میں ہوگا،پنجاب کے لائیوسٹاک سیکٹر کی پیداوار میں اضافے کے لئے ایمرجنسی لگانے کا فیصلہ کیا گیا ہے۔

وزیر اعلیٰ پنجاب محسن نقوی کی زیر صدارت لائیوسٹاک کے بارے میں اجلاس ہوا،صوبائی وزیرلائیوسٹاک ابراہیم حسن مراد بیجنگ سے ویڈیولنک کے ذریعے  اجلاس میں شریک ہوئے۔

اجلاس میں صوبائی وزیر لائیوسٹاک،ایڈیشنل چیف سیکرٹری،سیکرٹری لائیوسٹاک، سیکرٹری خزانہ، آل پاکستان میٹ ایکسپوٹرز ایسوسی ایشن کے صدر، کمشنر ڈیرہ غازی خان اور کمشنر بہاولپور پر مشتمل کمیٹی تشکیل دی گئی، کمیٹی پنجاب کے لائیوسٹاک سیکٹر کی پیداوار بڑھانے کے لئے ٹھوس پلان مرتب کرے گی۔ کمیٹی لائیوسٹاک کی ایکسپورٹ بڑھانے کے لئے بھی جامع تجاویز پیش کرے گی، لائیوسٹاک کے نرخ مقرر کرنے یا نہ کرنے کیلئے بھی کمیٹی اپنی سفارشات پیش کرے گی۔

وزیراعلیٰ نے لائیوسٹاک کی پیداوار اور ایکسپورٹ بڑھانے کے لئے 4روز میں حتمی پلان طلب کر لیا۔

وزیراعلیٰ نے کہا کہ پنجاب میں جانوروں کے بیماریوں سے پاک زون قائم کئے جائیں گے۔طویل پریزنٹیشنز کی بجائے مختصر اور جامع پلان تیار کیا جائے،جس پر فوری عملدرآمد کیاجا سکے۔سعودی عرب،کویت او رمتحدہ عرب امارات میں لائیوسٹاک ایکسپورٹ کرنے کی بہت گنجائش ہے۔ہم نے فوری طو رپر قابل عمل پلان کے ذریعے خلیجی ممالک میں لائیوسٹاک کی ایکسپورٹ کو بڑھاناہے۔

محسن نقوی نے کہا کہ یہ وقت ایکشن کاہے او رہم نے بغیر وقت ضائع کئے پیداوار اور ایکسپورٹ بڑھانے کے لئے فوری اقدامات کرنے ہیں۔

اجلاس میں ایڈیشنل چیف سیکرٹری، سیکرٹریزپلاننگ اینڈ ڈویلپمنٹ، لائیو سٹاک، لوکل گورنمنٹ،خزانہ، جنگلات، وائس چانسلر ویٹرنری اینڈ اینمل سائنسز لاہور، ڈی جی پروڈکشن لائیوسٹاک، چیئرمین لائیوسٹاک بریڈنگ سروسز اتھارٹی،صدر آل پاکستان میٹ ایکسپوٹرز اینڈ پروسیسرزایسوسی ایشن اورجنرل سیکرٹری آل پاکستان میٹ ایکسپوٹرز شریک ہوئے۔