نجکاری سے پہلے پی آئی اے وینٹی لیٹر پر، آج اندرون و بیرون ملک 26 پروازیں منسوخ کر دی گئیں

ایندھن کی محدود پیمانے پر فراہمی کے سبب پی آئی اے کے فضائی آپریشن کا دائرہ سکڑ گیا،آج(بدھ/ 18 اکتوبر)کو ملکی اور غیرملکی 26 پروازیں منسوخ کردی گئیں۔

 ترجمان پی آئی اے کے مطابق قومی ائیرلائن کے طیاروں کو پی ایس او کی جانب سے روزانہ کی بنیاد پر ایندھن کی محدود پیمانے پر فراہمی اور آپریشنل وجوہات کے باعث متعدد پروازیں منسوخ کر دی گئی ہیں جبکہ کچھ پروازوں کی روانگی کے اوقات میں ردو بدل کیا گیا ہے۔

ترجمان پی آئی اے نے بتایا کہ ایندھن کی عدم دستیابی کے باعث 17 اکتوبر کو اندروں ملک 13 پروازیں جبکہ 11 بین الاقوامی پروازیں منسوخ ہوئی ہیں۔ 12 پروازوں کی روانگی میں تاخیر ہوئی ہے۔ترجمان کے مطابق ایندھن کی فراہمی کی موجودہ صورتحال کو مدنظر رکھتے ہوئے پی آئی اے نے 18 اکتوبر کو 16 بین الاقوامی پروازیں اور 08 اندرون ملک پروازیں منسوخ کر دی ہیں جبکہ چند پروازوں کی آمدوررفت میں تاخیر متوقع ہے۔

منسوخ ہونے والی پروازوں کے مسافروں کو متبادل پروازوں پر ایڈجسٹ کر دیا گیا ہے۔پی آئی اے مسافروں کو درپیش زحمت پر معذرت خواہ ہے۔ ترجمان نے معزز مسافروں سے درخواست کی ہے کہ وہ ائر پورٹ آمد سے قبل پی آئی اے کال سینٹر، پی آئی اے دفاتر یا اپنے ٹریول ایجنٹ سے ضرور رابطہ کر لیں۔

نگران حکومت پی آئی اے کی جلد سے جلد نجکاری چاہتی ہے اور اس کے لیے مالیاتی مشیر کے تقرر کا عمل بھی شروع کر دیا گیا ہے۔