ورلڈ کپ سے پہلے ایشین کرکٹ کے 3 بڑوں کا ٹاکرا، بڑے امتحان کی تیاری کا موقع

ایشیا کی کرکٹ کے تین بڑے  بھارت، پاکستان اور سری لنکا کو بدھ سے شروع ہونے والے ایشیا کپ میں اکتوبر میں ہونے والے 50 اوور کے ورلڈ کپ سے پہلے ایک دوسرے کو جانچنے کا آخری موقع ملے گا۔

روایتی حریف بھارت اور پاکستان اگر چھ ملکی چیمپیئن شپ میں ہر طرح سے آگے نکل جاتے ہیں تو وہ تین بار ٹکرا سکتے ہیں۔

پاکستان اور سری لنکا مشترکہ ٹورنامنٹ کے میزبان ہیں،یہ ایک ہائبرڈ ماڈل ہے جس پر  ورلڈ کپ کے میزبان بھارت کے پاکستان کا دورہ کرنے سے انکار کے بعد اتفاق کیا گیا، فائنل 17 ستمبر کو کولمبو میں ہوگا۔

بابر اعظم کی قیادت میں پاکستان ٹیم افغانستان کے خلاف سیریز میں 3-0 سے کلین سویپ کرنے کے بعد دنیا کی ٹاپ رینکنگ ون ڈے ٹیم بن گئی، پاکستان ٹیم ملتان میں ایشیا کپ میں ڈیبیو کرنے والے نیپال کے خلاف بدھ کو اپنے گھر پر مہم کا آغاز کرے گی۔

بابراعظم، جنہوں نے افغانستان سیریز میں 113 رنز بنائے، شاہین شاہ آفریدی، نسیم شاہ اور حارث رؤف جیسے فاسٹ باؤلنگ اٹیک پر مشتمل ٹیم کی قیادت کر رہے ہیں۔

روہت شرما کی قیادت میں ورلڈ کپ کی میزبانی کرنے والا ہندوستان، اپنی مہم کا آغاز ہفتہ کو پالیکیلے میں پاکستان کے خلاف میچ سے کرے گا۔

ہندوستان اور پاکستان دیرینہ سیاسی تناؤ کی وجہ سے صرف بین الاقوامی ٹورنامنٹس میں ایک دوسرے کے خلاف کھیلتے ہیں، توقع ہے کہ سپر فور مرحلے میں ایک بار پھر آمنے سامنے ہوں گے اور فائنل میں تیسری بار آمنے سامنے ہو سکتے ہیں۔

بھارت کے روہت شرما کا کہنا ہے کہ یہ صرف پاکستان نہیں ہے، اور بھی ٹیمیں ہیں،سری لنکا نے گزشتہ سال ایشیا کپ جیتا تھا۔ اس لیے اور بھی ٹیمیں ہیں جو اچھی کرکٹ کھیل رہی ہیں اور ہمیں چیلنج کریں گی۔

‘خود کو آزمائیں گے’

روہت نے کہا کہ ایشیا کپ "خود کو جانچنے، کوشش کرنے اور خود کو دباؤ میں رکھنے اور اس دباؤ کا جواب دینے کے لیے بہترین جگہ ہے۔”

ویرات کوہلی، شبمن گل اور روہت کے ساتھ کے ایل راہول اور شریاس آئر کی واپسی سے ہندوستان کی بیٹنگ کو تقویت ملی ہے۔

50 اوور کا ورلڈ کپ 5 اکتوبر سے بھارت میں شروع ہوگا۔

سری لنکا، جس نے گزشتہ سال دبئی میں ایشیا کپ جیتا تھا جمعرات کو کینڈی میں بنگلہ دیش کے خلاف اپنے افتتاحی میچ سے قبل انجری کا شکار ہو گیا تھا۔

تیز گیند باز دشمنتھا چمیرا کندھے کی انجری کے باعث ٹورنامنٹ سے باہر ہیں اور لیگ اسپنر وینندو ہسرنگا کی کم از کم گروپ میچوں میں شرکت مشکوک ہے جو آٹھ دن قبل ران میں تکلیف کے باعث لنکا پریمیئر لیگ کے فائنل سے باہر ہو گئے تھے۔

تمیم اقبال کمر کی چوٹ کے باعث کپتانی سے دستبردار ہونے سے ساتھ بنگلہ دیش کو مشکلات کا سامنا کرنا پڑا۔

تجربہ کار آل راؤنڈر شکیب الحسن کو ورلڈ کپ کے اختتام تک دوبارہ کپتان مقرر کر دیا گیا ہے۔ اس سے قبل انہوں نے 2009 سے 2017 کے درمیان 50 ایک روزہ بین الاقوامی میچوں میں بنگلہ دیش کی قیادت کی تھی۔

افغانستان، پاکستان سے اپنی حالیہ شکست کے باوجود، راشد خان، مجیب الرحمان اور محمد نبی کے طاقتور اسپن اٹیک سے مسائل پیدا کر سکتا ہے۔

ان کے پاس فارم میں موجود بلے باز رحمان اللہ گرباز بھی ہیں جنہوں نے پاکستان کے خلاف دوسرے میچ میں ہارنے کے باوجود 151 رنز بنائے۔

گروپ اے میں بھارت اور پاکستان کے ساتھ نیپال ہے۔ سری لنکا، بنگلہ دیش اور افغانستان گروپ بی میں شامل ہیں۔

ہر گروپ سے سرفہرست دو ٹیمیں سپر فور میں پہنچتی ہیں اور اسٹینڈنگ میں سرفہرست دو ٹیمیں فائنل میں پہنچتی ہیں۔