پاکستان
چین میں پاک بحریہ کے جدید جنگی جہازوں کی کمشننگ تقریب
پاک بحریہ کے لیے تعمیر کردہ دو جدیدجنگی بحری جہازوں پی این ایس ٹیپو سلطان اور پی این ایس شاہجہان کی پُروقار کمشننگ تقریب چین کے ہڈونگ ژونگھوا شپ یارڈ شنگھائی میں منعقد کی گئی۔ چیف آف دی نیول اسٹاف ایڈمرل محمد امجد خان نیازی نے تقریب میں بطور مہمان خصوصی شرکت کی اور روایتی کمانڈ اسکرولز جہازوں کے کمانڈنگ آفیسرز کی حوالے کیں۔
تقریب سے خطاب کرتے ہوئے امیر البحرنے اس بات پر روشنی ڈالی کہ پی این ایس ٹیپو سلطان اور پی این ایس شاہجہان کی کمشننگ پاک چین دوستی میں ایک نئے باب کا آغازہے جو اعتماد، احترام اور باہمی تعاون کے ستونوں پر مضبوطی سے قائم ہے اور یہ ہمارے دفاعی تعاون سے ظاہر ہے۔ امیر البحر نے مزید کہا کہ عوامی جمہوریہ چین کے تعاون سے پاک بحریہ نے اپنی قوت اور صلاحیتوں میں اضافے کے لیے خاطر خواہ اقدامات کیے ہیں۔ مہمان خصوصی نے واضع کیاکہ ٹائپ A/P-054 راجیکٹ کی تکمیل سمندری خطرات کا جواب دینے اور خطے کے امن و استحکام میں کردار ادا کرنے کی صلاحیتوں کو مضبوط کرنے کی طرف ایک اہم قدم ہے۔نیول چیف نے وبائی چیلنجز کے باوجود منصوبے کی بروقت تکمیل کے لیے BOMETEC، SASTIND، چینی بحریہ،ہڈونگ ژونگھوا شپ یارڈ اور CSTC سمیت بحری جہازوں کی تعمیر میں شامل تمام اسٹیک ہولڈرز کی مشترکہ کوششوں کو سراہا۔
پاکستان اور چین کے درمیان پاک بحریہ کے لیے چارملٹی رول فریگیٹس (ٹائپ A/P-054 ) کی تعمیر کا معاہدہ 2018 میں ہوا تھا جس کے تحت پہلے دو بحری جہازپی این ایس طغرل اورپی این ایس تیمور 2022 میں پاک بحریہ کے بیڑے میں شامل ہوئے۔ان جہازوں کی تعمیر جدید اسٹیلتھ ڈیزائن پرکی گئی ہے جس میں سمندری خطرات سے نمٹنے کے لیے بیک وقت متعدد بحری آپریشنز انجام دینے کی صلاحیت موجود ہے۔4000 ٹن وزنی یہ جہاز تکنیکی طور پر جدید اور انتہائی قابل پلیٹ فارم ہیں جن میں سطح سے سطح، زمین پر حملہ، سطح سے ہوا اور زیر آب حملہ کرنے کے ساتھ ساتھ نگرانی کی وسیع صلاحیت موجود ہے۔ یہ بحری جہازسمندری تجارتی گزرگاہوں کے تحفظ میں اپنا کردار ادا کرتے ہوئے ڈیٹرنس اور خطے میں خطرات سے بچاؤ کے لیے کردار ادا کریں گے۔
چین میں تعینات پاکستان کے سفیر اور ہڈونگ ژونگھوا شپ یارڈ کے حکام سمیت اعلیٰ سول اورعسکری شخصیات نے تقریب میں شرکت کی