افغانستان میں کالعدم ٹی ٹی پی کے ٹھکانوں پر تشویش، افغان عبوری حکومت دوحہ معاہدے پر عمل یقینی بنائے، آرمی چیف

پاک فوج کے سربراہ لیفٹیننٹ جنرل عاصم منیر نے افغانستان میں کالعدم تحریک طالبان کے ٹھکانوں اور کارروائیوں کی کھلی چھوٹ پر پر تشویش کا اظہار کرتے ہوئے کہا ہے کہ افغان حکومت دوحہ معاہدے کی پاسداری یقینی بنائے۔

پاک فوج کے ترجمان ادارے آئی ایس پی آر کے مطابق آرمی چیف جنرل سید عاصم منیر نے کوئٹہ گیریژن کا دورہ کیا، جہاں انہیں ژوب میں ہونیوالے حالیہ دہشتگرد حملے سے متعلق بریفنگ دی۔

جنرل عاصم منیر نے سی ایم ایچ کوئٹہ میں زخمیوں کی عیادت بھی کی،  انہوں نے شہدا کو بھرپور خراج عقیدت پیش کیا۔

 آئی ایس پی آر کے مطابق مسلح افواج نے افغانستان سے ٹی ٹی پی کی دہشتگرد کارروائیوں پر تشویش کا اظہار کیا ہے، پاک فوج کے مطابق افغانستان میں کالعدم ٹی ٹی پی کے محفوظ ٹھکانے موجود ہیں، توقع ہے افغان حکومت اپنی سرزمین کسی کیخلاف استعمال نہیں ہونے دے گی۔

آئی ایس پی آر کے مطابق لیفٹیننٹ جنرل سید عاصم منیر نے کہا کہ افغان عبوری حکومت دوحہ معاہدے پر عملدرآمد یقینی بنائے، پاکستان میں دہشت گردی میں افغان شہریوں کے ملوث ہونے پر تشویش ہے، کالعدم تحریک طالبان کو افغانستان میں کھلی چھوٹ ہے،مسلح افواج دہشتگردی کو جڑ سے اکھاڑ پھینکیں گی۔

آرمی چیف جنرل عاصم منیر نے کہا کہ یہ دہشت گرد حملےناقابل قبول ہیں، مسلح افواج کے موثر اقدامات کے نتیجے میں یہ حملے ہورہے ہیں، دہشت گردوں کے خلاف آپریشنز جاری رہیں گے۔