ووٹ کی پرچی کو جہاد سمجھیں، ہمیں آسان جہاد ملا ہے، مولانا فضل الرحمان

جمعیت علما اسلام (ف) کے امیر مولانا فضل الرحمان نے کہا ہے کہ ہم نے پگڑیاں اس لئے نہیں باندھی ہے کہ جھک جائیں، اللہ تعالیٰ نے ہمارے لئے جنگ تلوار اور بندوق سے لے کر ووٹ کی پرچی تک آسان کی ہے۔

لکی مروت میں ورکرز کنونشن سے خطاب کرتے ہوئے قائد جمعیت مولانا فضل الرحمن نے کہا کہ ہماری حکومت میں بچوں کی تعلیم مفت تھی، چیلنج کرتا ہوں ایف ایس سی تک تعلیم مفت کی تھی، صحت کے شعبہ میں دوائیاں مفت تھیں، ہر ضلع میں اے لیول ہسپتال کا قیام یقینی بنایا، مخصوص طبقے کا پیٹ پالنا ہمارا مقصد نہیں، یہ نظریاتی جنگ ہے۔

مولانا فضل الرحمان نے کہا کہ ہماری اسمبلیاں ان لوگوں سے بھری ہوئی ہیں جن کی اسلام میں کوئی دلچسپی نہیں ہوتی ہے، امریکہ اور مغربی دنیا کے مقابلے میں حق آواز اگر بلند کی ہے تو وہ واحد جماعت جمعیت علماءاسلام ہے، افغانستان پر امریکی بمباری کے وقت پاکستان کی سڑکوں پر صرف جمعیت علماءاسلام کھڑی تھی، افغانستان اب پاکستان دوست ملک کے طور پر ہمیں ملے گا۔

فلسطین کے بارے میں بات کرتے ہوئے قائد جمعیت نے کہا کہ عرب کی سرزمین پر اسرائیل اور یہودیوں کا ناجائز قبضہ ہے، امریکی پشت پناہی سے ایک ملک بنتا ہے، جناح صاحب نے 1940ءکی قرارداد میں کہا تھاکہ اسرائیل ناجائز حکومت ہے، 7 اکتوبر کو فلسطین نے جو حملہ اسرائیل پر کیا ساری فضا تبدیل ہوگئی، 25 ہزار فلسطینی اب تک شہید ہوچکے ہیں، یہی امریکہ آج ہمیں انسانی حقوق بتلاتا ہے، جنوبی افریقہ عالمی عدالت انصاف گئی اور فلسطین کے حق میں بات کی، اللہ تعالیٰ نے ہمیں جرات دی قطر میں حماس قیادت سے ملاقات کی اور ان کو یقین دلایا کہ ہم آپ کے شانہ بشانہ ہیں، ہمارے مقابلے میں جو الیکشن لڑ رہے ہیں ان میں جرات ہے کہ مسلمانوں کیساتھ کھڑے ہوسکیں، ووٹ کی پرچی جہاد کی تلوار سمجھیں گے، آسان جہاد ہمیں ملا ہے، میں اسلام کی بات افغانستان اور فلسطین میں کرسکتا ہوں تو لکی مروت میں کیوں نہیں کرسکتا۔